صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

20 نوفمبر 2018

أبواب الموقع

 

تحقيقات

أرض الفيروز

24 ابريل 2014



شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بعيد تحرير سيناء، بعد عودة أرضها إلى السيادة المصرية والذى يوافق 25 أبريل من كل عام.
وأرض سيناء أو أرض الفيروز قد تغنى بها العديد من الشعراء فى قصائدهم والتى سال فى سبيل عودتها الكثير من الدماء المصرية الطاهرة، انتهاءً بطاولة المفاوضات التى تمت بعد انتصار أكتوبر المجيد.

 

طالعين على أرض الفيروز

طالعين على أرض الفيروز
الرمل ماس والقلب كنوز
اخضرى يا سينا مطرح خطاوينا
بعرقنا نرويكى بالحب تروينا
دى ميتك شربات اللوز
على الرملة لافرد منديلى
وافرش جنينى على جبينى
واندة على الحلوة تجيني
دنا كنت نادرها فى يوم محررها
واقول مفش غيرها
 عروستى من أرض الفيروز
من غير ما تندة أنا جاية
 دنا من زمان مستنية
 يوم الفرح والصبحية
فستانى بحراوى والحنة سيناوي
دنا جدى شرقاوى
مصرية من أرض الفيروز
يا نعسة ورجعلك ايوب
عدى القنال وجيبلك توب
اخضر بلون وشم المحبوب
يام الجبين عالى دة مهرك الغالى
بروحى وبمالى دفعتة على أرض الفيروز
دى الارض بالخير ولادة
 والمية عندنا بزيادة
 نرويها تطرح سجادة
 ده كل رملاية شجرة ونخلاية
نسمة وضلاية على بتنا فى أرض الفيروز
نحلف بطور سنين وشقنا طول السنين
 لنخلى أرضك بساط
لون ابتسمت البنات ونعوضك على اللى فات
وتندهى تلتئينى ليل نهار حاضر
يا سينا يا أرض الفيروز

شعر: عبدالسلام أمين


راية العرب


عجـبى عـلى راية العـرب فى الريح
فى الأرض ثابـتة وفى السـما تـفاريح
والنجمتـيـن الخـضر بيبـصـوا لـنا
وبـيـقـولوا لنـا بكل عربى فصـيح
 الوحـدة الوحدة الوحدة
 مجد العرب فى الوحدة
الوحـدة رايـة ونجمتـينـها صبـايـا
علـشان عـيونهم ياما راحوا ضـحايـا
شجـعان زمـان فرسان حروب الوحدة
مـن دمـهم نبـتـت وصبحـت رايـة
وكـم شهـيد وسـط المـيدان وجـريح
هتـف وقـال بكـل عربى فصـيـح
الوحـدة الوحدة الوحدة
مجد العرب فى الوحدة
يا نجمتـين يا خُضـْر يا عـيون بـلدى
بـاحبـكـم حبى لبـنـتـى وولدي
حبى لأبويـا وأمى يا نجـوم رايتـى
بـاحـبـكم حبى لـعزى ومـجـدى
وزى مـا العربى كـلامـه صريـح
أنـا أقـول بـكـل عربى فـصـيـح
الوحـدة الوحدة الوحدة
مجد العرب فى الوحدة
زى الربيـع مـا لابـد يـوفى بـوعـده
لابـد يـوم كـل العــرب يـتـحـدوا
ونجـمة خضـرا بعـد نجـمة حاييجوا
يتـقابلوا فى الرايـة مكـان ما اتواعدوا
ويرفـرفـوا فى العيد عـلى المراجـيح
 وهنـاك يقـولوا بكـل عربـى فصـيح
الوحـدة الوحدة الوحدة
مجد العرب فى الوحدة
عجبى على راية العرب
عجبى!
 
شعر: صلاح جاهين

صباح الخير يا سينا

 فى الأولة قلنا جيِّنلك وجينالك
ولا تهنا ولا نسينا
والتانية قلنا ولا رملاية فى رمالك
عن القول واللة ما سهينا
والتالتة إنتى حملى وأنا حمالك
صباح الخير يا سينا
وصباح الخير يا سينا
رسيتى فى مراسينا
تعالى فى حضننا الدافى
ضمينا وبوسينا يا سينا
مين اللى قال كنتى بعيدة عنى
إنتى اللى ساكنة فى سواد الننى
مش سهل ع الشبان يسهوا عن الأوطان
ورسيت مراسينا على رملة شط سينا
وقلنا يهون علينا
دا أول الشطئان
وصباح الخير يا سينا
رسيتى فى مراسينا
تعالى فى حضننا الدافى
ضمينا وخدينا يا سينا
الأولة قلنا.. والتانية سيرنا
والتالتة سيرنا وحطينا ع الرملة
قالوا الحياة غالية
قلنا الشرف أغلى
بلادى يا بلادى يا عيون قمر الربيع
اندهى يا بلادى يجاوبك الجميع
وصباح الخير يا سينا
رسيتى فى مراسينا
تعالى فى حضننا الدافى
ضمينا وخدينا يا سينا
 
شعر : عبدالرحمن الأبنودي

مصر اليوم فى عيد


ياللى من البحيرة وياللى من آخر الصعيد
ياللى من العريش الحرة أو من بور سعيد
هنوا بعضيكم وشاركوا جمعنا السعيد
سينا رجعت كاملة لينا
ومصر اليوم
 مصر اليوم فى عيد
ألف ميت مبروك علينا بالسلام
حقنا عاد بين ايدينا بالتمام
وإحنا حنصونوا فى عينينا ع الدوام
أصل مافى ع الارادة أى شىء بعيد
سينا رجعت كاملة لينا
ومصر اليوم فى عيد
ليل نهار عاهدونى نبنى ليل نهار
علشان مصر بلدنا تبقى فى ازدهار
نبنى ونحولها جنة بالعمار..
والامان ضليلة فوقنا وكل ايد فى ايد
سينا رجعت كاملة لينا
 ومصر اليوم فى عيد
بكره أحلى م النهارده.
بكره ياجيلنا الجديد
تحصدوا خير ما زرعنا..
 والجميع يسعد أكيد
مصر علشان تقوى بينا
لازم الانتاج يزيد
 والكلام مش وقته خالص..
العمل هو المفيد
سينا رجعت كاملة لينا
ومصر اليوم فى عيد

شعر : عبدالوهاب محمد


النجمة مالت ع القمر


النجمة مالت ع القمر فوق فى العـلالى
قالت لة شايفة يا قمــر أفراح قبــالـى
قال القمر بينــا نسهر علــى المينـــا
 دا النور على شط القنال سهـران يلالى
شاف القمــر ع الضفتيــن زفـــة وزينة
قال دا الســلام فارد جـنــاحة على المدينـة
واللى تحلـــــى المحبــة والـغنـا
واوعوا تخــلوا فــى أرضــكم دمـعة حزينة
قال القمر بينـــا نسهر علـى الميـــنـا
دا النور على شط القنـال سهـران يـــلالى
النجمة مـالـت ع القمر فوق فـى العلالى
قولوا لدمـوع الفــرح تـروى كـل وردة
خلــوا الأمـــل يبـقى تمللـى شمعة قايدة
حيوا اللــى قال نفتــح لأحبـابنـا الـقنـال
 وخلــوا بكرة يبقى أحلــى م النهاردة
قـــال القمر بينــا نسهـــر على المينا
دا النــور على شــط القنال سهـران يلالى
النجمة مــالت ع القمر فوق فــى العلالـى

شعر: محسن الخياط







الرابط الأساسي

الاكثر قراءة

لا إكـراه فى الدين
كاريكاتير أحمد دياب
الاتـجـاه شـرقــاً
الملك سلمان: فلسطين «قضيتنا الأولى» و«حرب اليمن» لم تكن خيارا
2019عام انطلاق المشروعات العملاقة بـ«الدقهلية»
السيسى: الإسلام أرسى مبادئ التعايش السلمى بين البشر
الأموال العامة تحبط حيلة سرقة بضائع شركات القطاع الخاص

Facebook twitter rss