صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

19 سبتمبر 2018

أبواب الموقع

 

ثقافة

واحه شعر

31 مارس 2014



يسيل بجوار النيل فى بر مصر نهر آخر من الإبداع.. يشق مجراه عبر السنين والأجيال داخل نفوس المصريين.. فى سلسلة لم تنقطع.. وكأن كل جيل يودع سره بالآخر.. ناشرين السحر الحلال.. والحكمة فى أجمل أثوابها.. فى هذه الصفحة نجمع شذرات من هذا السحر.. للشعر.. سيد فنون القول.. الذى يجرى على ألسنة شابة موهوبة..
 شارك مع فريق «روزاليوسف» فى تحرير هذه الصفحة بمشاركتك على  [email protected]

بحبك

يا ست الحبايب يا شمس المكان
يا زارعه المحبه فـ حضن الشقا
حازز فـ قلبى عنادى اللى كان
بيبعدنى عنك فـ وقت اللُقا
بحبك بقى يا مريم زمانك فـ هذا الزمان
يا امى و ابويا بحُكم القدر
أد اللى نِزلوا فـ بلدنا الميدان
أد اللى شافوا فـ يناير خطر
بحبك مطر بينحت فـ عقلى صخور الجنان
ويرسم ملامح لـ شِعرى القوى
زى اللى دايب فـ بنت الجيران
ونفسُه فـ ضمه تقولّه إرتوى
بحبك أوى يا فاتحه تملى قصادى البيبان
انا كل مَ اكبر أعيل زياده
زى اللى تابوا و عدلوا الميزان
وعرفت خُطاهم طريق السعاده
بحبك عباده
يا اول صداقة الحروف بـ اللسان
فاكره اما كنتى عليا تسمى
فاكره اما كنتى تراقبى السنان
و كل اما اعيط تحاجى وتضُمى
بحبك يا امى
بحبك تُقى وسجدة سحر فـ ليل منطوى
ختموا لصاحبهم بنُطق الشهاده
بحبك بقى
بحبك مطر
بحبك اوى
بحبك عباده .

   شعر : عبدالتواب محمد

برج الحمام

برج الحمام راح فين
بيزيّن الداخلة
والخوخ وشجر التين
والتوتة والنخلة
والموردة ع الشطين
فيها بنات حلوين
بيصبّنوا الفساتين
لليلة الدُخلة
وحسين أبوالعباس
سهران على الكباس
والمصطبة فى الغيط
لمّت جميع الناس
ومراته والولدين
ع الراكية سهرانين
وسكر التموين
شايلينه فى المخلة
حتى القمر سهران
فرحان بلعب الزان
والنسمة بتغنيّ
وتسمّع الغيطان
بلاص وحوّايه
وبرام ومقلاية
والسٌُرّة فى التاية
ومايّه للعطشان
والناس كانت حافية
بسْ النفوس صافية
وما كانش فيه برْدان
طول ما القلوب دافية
ولكل دار مسئول
راجل كبير معقول
ونخاف ياكلنا الغول
لو بات ليلة بعافية
وعم عبدالعال
سارح يومية زمال
رغم الشقا إيده
ما مدّهاش بسؤال
إيده اللى فيها شقوق
مليانه طين مزنوق
ويقول دى بكرة تروق
ويجيب طاقيّة وشال
ومنال مع فلـّه
بيدرسوا الغلة
والضهر جات عزه
بالأكل والقلة
الهمّة يا صبايا
دا انا جبت ويّايا
برّاد وكبّاية
ودبارة ومسلة
شايلة الحمول عنايات
من يوم راجلها ما مات
متحزّمه فى الغيط
وبتعزق الكرّات
غدر الزمن طالها
لمّا المرض جالها
بتربيّ فى عيالها
وخلفتها ست بنات
والقطن بالشيلة
أبيض طويل تيلة
والشال محلاوي
محلاكى يا عديلة
بالطرحة فى الحنّة
والزفة ع السنة
ما فيش عزول بنـّا
يا مشرّفة العيلة
ياخسارة ع المجداف
والهودية ويّا الناف
والساقية ضلاية
بالتوتة والصفصاف
راح الجمال والخير
والزلعه تحت الزير
وحتىّ صوت الطير
ما عادش فى الأرياف

شعر : سعد الشرقاوى

حالة هستريا

متلملميش ورق الرسايل والصور
وتحضنيها
مبقاش يفيد
ولا تنهدى
بردت خلاص همستك
صبحت جليد
كان اللقا حلم فـ حياتي
من النهارده أصبح فراقك
يا حبيبتى عيد
متدندنيش
مسيره راجع
ولا تحلميش
فى يوم بتشبيكة صوابع
كسرى لوح المرايا
قولى خاين
قولى قاسي
قولى لازم يوم هيشرب
من مر كاسي
والكراسي
مترصصه بمليون حبيب
قولى مش فارقه معاكى
إنى أحضر
أو أغيب
والأمير يحلم بـ توبك
بس دور عـ النصيب
شدى شعرك واصرخي
قولى آآآآآه
اصرخى من جوا جوا
كسرى براويز صورنا
حطميها بكل قوه
قولى بكره هندمك
وهعلمك ازاى تبعني
بصى ليا فى برواز مكسر
وقولى عامل مش سامعني
فشى غلك فـ الهدايا
كسريها قطعيها
واحضنيها والدموع زى المطر
تمتمى بحروف عتابك
ع النصيب أو ع القدر
اسرحى تانى بخيالك
يوم ما نقشنا حلمنا
يا حبيبتى ع الشجر
والمختصر
إنى رجوعى
يا حبيبتي
مش منتظر

  شعر : محمد مهران

اسمك يكون مصر

 

 عاشقك ومعرفشى
 غيرك فى دنيايا
 العشق مش حاله
العشق ده غوايا
 م انت اساس لغوى
 وانت اللى جوايا
 أول ما جيت للأرض
 لقيتنى بتهجى
 اسمك يكون مصر
 لقيتنى كالآية
 احفظها تحفظني
 وتكون اساس حصني
 او مرة جه غادر
 القاها تنصفني
 علشان كده عاشق
 يا مصر لترابك
 دايما يقولوا بيع
 اقولهم عاجز
 ما قدرش اتركها
 واكسر بخاطرها
 دى حبيبتى وأنا منها
 فازاى ابيع خيرها
 واروح أنا لغيرها
 علشان فى يوم انت
 والحظ عاندها
مابقاش أنا مصري
 وابقى حاجة تانيه
 لو مرة فكرت
 انى ابيع اصلي
 واتخلى عن مصر
 لما الزمان عاند
 بهواكى يا مالي
 وكل احوالي
 ياحته من روحي
 يا فردالى جناحك
علشان اطير عالي
 يا مرسومة بنيل
 بيلم عشاقك
 بيغنولك مواويل
 وبيهتفوا اسمك
 وبيعشقوا دائك
 ويقولوا ده سرك
يدوم علينا حبك
 يا كايده حوسادك
 بالحب بتلمى
 انت كده ولادك
 وبلقمة مقسومة
 بتكسرى زادك
 والبسمة مرسومة
 برغم كتير همك
 وعلامة النصر
 بتهز أعدائك
 يا رب يحميكي
 وتعيشى لولادك

شعر -نادر النجار

فؤاد مجروح

ساعات بياخدنى السكات
وارجع لشوق الذكريات
أضحك على نفسى وأقول
الماضى كان
واهو راح وفات
قلبى اللى عايش من زمان
مشتاق لترنيمة حنان
اتباع وهان
كل الحبايب غدارين
باعوا الوداد والعشرة
والشوق والحنين
وحياة دموعى اللى انكوت
وحياة فؤادى اللى انجرح
لاسقى قلوبهم من عذابى
وحيرتى ودموع الفرح
م انا كنت لسة صغيرة
وردة جميلة معطرة
قتلوا البراءة ومهجتى
وسابونى فوق متحيرة
الذنب دا مش ذنبهم
ذنبى أنا
والغدر كان من طبعهم
طول السنين
أغفر لهم جرح الزمن
وللا أشكى مين ؟؟
يا ألف اّه ..
اّه يا زمن
لما الحبيب كده يؤتمن
على قلب مليان بالحنين
ويدوس عليه
الدنيا دوّاره وأكيد
يوم يفرح القلب الحزين
يحصد حصاد زرع السنين
وأنا هانسى حتى حبهم
وابدأ حياتى من جديد
ولا ها افتكر ..
جرح السنين .

  شعر: إلهام شحاتة

عشوة حب

باحب أفــــرح
وأحب كمـــان
وشوش الخلق فرحانه
وأحب أسرح
ف أى مكان  
بشرط يا عمرى القانا
وأحبك يا غُنا ناقش على الوجدان
أمانينا اللى عطـــشانا
واحب الحـــب
قد القمح والعصافير
وقد النيل
واحب نوارس البدريه
على حضن الهوى بتميل
واحبِك .. توت وجميزة
وصف نخيل
وأحبِك
وشوشات الضى وقت أصيل
ف عشوة حُــــب
 قلبى يطب
أحب .. الـ قهوة من إيدك
وأتحرر من الأحزان
عشان أقدر أكون عيدك
واحب الكد علشانك
وجد الجد ..
بحسدنى ونا راجع
وعطشانك .. فتروينى
وتحضن طلتك عينى
أشوف جدا تفاصيلك
ف تكوينى.

شعر : محمد سعيد       

ولد فلاح

ولد فلاح ..
وقلبه فى العسل سواح
عيونه غناوى مصرية
عبيره المشمش الفواح
يحلّق جوه ننى العين
و يفرش فى الغيطان أفراح
تحنن ضحكة الحلوين
و شوقه يجنن الشياطين
فترقص له ملاغية
ولد فلاح
وعنده فى الغرام قدره
بيلضم من الدفا حكاية
يوشوشها لشمس اليوم
تبات تسهر فى شوق بالليل
و تغزل له فى نور بكرة
و يااانى
ياااانى لما قلبه يدوب
واحسه
جوه حلم جميل
بيلمس فى العيون ترانيم
يلفلف عمرى فى الأزمان
وقلبه جوه قلبى ينام
يقسم نبضتى أوتار
ويعزفنى بلهيب لهفه
والاقى كلى عنده يروح
فيغزل لى برمش الروح
جناحى وأجرى له وأطير
أرفرف زى فرد حمام
جناحه جوه حضنى ينام
يحط برأسه فى حجرى
و أفرد له أنا فى صدرى
براحى وهو فيه يرتاح
و لد طراح
عبير بيهف من الجنة
يمس بنوره على الدنيا
تميل بكفوفها تتحنى
ولد
فى دراعه شجراية
بتفرش فى السحاب خضره
تفرح فى السما تفاح
ولد
فلاح .

           شعر : أمل درويش

 

 

 

 

 

 

 

 

 







الرابط الأساسي

الاكثر قراءة

سَجَّان تركيا
«البترول» توقع اتفاقًا مع قبرص لإسالة غاز حقل «أفردويت» بمصر
ادعموا صـــــلاح
الحلم يتحقق
نجاح اجتماعات الأشقاء لمياه النيل
ضوابط جديدة لتبنى الأطفال
مفاجآت فى انتظار ظهور «مخلص العالم»

Facebook twitter rss