صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

18 نوفمبر 2018

أبواب الموقع

 

ثقافة

إبداع

19 ديسمبر 2013



صلاح جاهين.. شاعر البسطاء

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بالشاعر الراحل صلاح جاهين، وننشر هنا عددا من قصائده ورسومه الكاريكاتورية، جاهين من مواليد 25 ديسمبر 1930 بحى بشبرا، وكان صلاح جاهين هو الأكبر بين إخوته، والده المستشار بهجت حلمى الذى تدرج فى السلك القضائى بدءاً من وكيل نيابة حتى عُين رئيساً لمحكمة استئناف المنصورة.


جمع جاهين بين الشعر والرسوم الكاريكاتورية واستطاع صلاح جاهين ببساطته وتلقائيته التعبير عن كل ما يشغل البسطاء بأسلوب يسهل فهمهه واستيعابه، وهو ما جعله فارساً يحلق برسومه وكلماته ويطوف بها بين مختلف طبقات الشعب المصرى، بل كانت جواز سفره لمختلف البلدان العربية التى رددت كلماته، ومن قصائدة المميزة قصيدة على اسم مصر وأيضا قصيدة تراب دخان التى  ألفها بمناسبة نكسة يونيو 1967. وكان مؤلف أوبريت الليلة الكبيرة أشهر أوبريت للعرائس فى  مصر إلا أن قمة أعماله كانت الرباعيات التى  كان يحفظها معظم معاصريه عن ظهر قلب، عمل صلاح جاهين رساما للكاريكاتير فى  صحيفة الأهرام حيث كان كاريكاتير صلاح جاهين أقوى من أى  مقال صحفى.

عناوين جرانين المستقبل


احـنا العـمال اللى انقـتلوا
قـدام المصنع فى ابو زعبل
بنـغـنى للدنـيـا ونـتـلو
عناوين جرانـين المستـقبل:
«وحـدة صـف الأحـرار»
«جـبـهـة لكـل الثـوار»
«عـبور الجـيـش لسـينا»
«الـزحف مـن الأغـوار»
«جـيش العـدوان يتقـهقر»
«الأرض قــايـدة نــار»
«والبـحر قـايـد نــار»
«الاستـعمار أثـبت فشـله»
«البـيت الأبيض لا يخجل»
«إحـنا العـمال اللى انقتلوا»
«قدام المصنع فى أبو زعبل»
بـنـغـنى للدنـيا ونتـلـو
عنـاوين جرانـين المستقبل:
«محـكـمة للـمـجرمـين»
«قائــمة بالمـتـهـمـين»
«إدانـة مسـتر نيـكسون»
«بقـتل الاسـطى ياسـين»
«القــاتل اسـتـعـمارى»
«القـتـلـى وطنــيـين»
«عـمــال مـدنـيـيـن»
«نـصارى ومسـلـمـين»
«مرتكبو المذبـحة يعتـقلوا»
«الحـكم عـى المتهم الأول»
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عنـاوين جرانـين المستقبل:
«الجـو غــدا يتحـسـن»
«معرض لزهور السـوسن»
«الخطـة الخـمسية تنـفذ»
«مهرجانات النـصر غـدا»
«تصـفـية الصهـيونـية»
«دولـة فلسطين .. تعـلـن»
«دستور وقوانين .. تعـلـن»
«حريـة الدين .. تعـلـن»
«قوس تذكارى جارى عمله»
«طالين منه احنا وح نفضل»
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عناوين
جرانين
المستقبل

اصحى يا نايم


النور ملوالشوارع
ومليون راديووالع
الساعة اتنين صباحا
لكن إيه الموانع ! ..
الخلق رايحة جايه
والدنيا لسه حيه
مليانه بالهأَوأَو
وزعيق القهوجية
واحد يقول لواحد :
خليك يا عم قاعد
التانى يقول له :
شكرا
ده انا م المغرب مواعد
فيه سهره لسه عندي
فى بيت فلان افندى
ح ناكل حاجة حلوه
ونشرب تمر هندى
واللى تروح دالقه جردل
فوق حضرة المبجل
طبعا صاحبنا يزعل
وينفجر شتايم
والحى كله يوصل
ما بين مصلح ولايم
اللى يقول : يا جماعة
واللى يقول : يا بهايم
ومطرب الاذاعة
يصرخ ، وف وجده هايم
ولوطرطقت ودنك ،
فى وسط دى العظايم ،
تسمع مسحراتى ،
بطبله صوتها واطى ،
بيقــــــــــــــــــــول :
اصحى يا نايم

 

 

على اسم مصر

النخل فى العالى والنيل ماشى طوالى
معكوسة فيه الصـور .. مقلوبة وانا مالى
يا ولاد أنا ف حالى زى النقش فى العواميد
زى الهلال اللى فوق مدنة بنوها عبيد
وزى باقى العبيد باجرى على عيالى
باجرى وخطوى وئيد من تقل أحمالى
محنيه قامتى .. وهامتى كأن فيها حديد
وعينيا رمل العريش فيها وملح رشيد
لكنى بافتحها زى اللى اتولدت من جديد
على اسم مصر
مصر .. التلات أحرف الساكنة اللى شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعى مقروطة
فى مسامى مضغوطه مع دمى لها تعاريج
ترع وقنوات سقت من جسمى كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبى جوه ضلوعى مضبوطة

على اسم مصر
وترن من تانى نفس النبرة فى ودانى
ومؤشر الفرحة يتحرك فى وجدانى
وأغانى واحشانى باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخدانى
انا اللى ياما الهوى جابنى وودانى
وكلام على لسانى جانى لابد اقوله لحد
القمح ليه إسمه قمح اليوم وأمس وغد
ومصر يحرم عليها .. والجدال يشتد
على اسم مصر
ولما زمانى رمانى عليل
نسيت كل شيء عن حبيبى الجميل
لكن هو أبداً
انا مانساهوش
نسيت مشيته وصوته كان شكله إيه
ورسمة شفايفه
ولمسة إيديه
نسيت نظراته
نسيت لون عينيه
وقوس الحواجب وسهم الرموش
لكن هو أبداً
انا ما انساهوش
نسيت إسمه وحكايته وعرفته فين
وعشنا سوى العمر
والا يومين
وكان م البشر
والا طير بجناحين
نسيت حتى كان له وجود أو مالوش
لكين هو أبداً
أنا ما انساهوش
قطعوا الأغانى وطارت نشرة الأخبار
دارت على كل دار فى الكوكب الدوار
يا حاضرين اعلموا الغايبين بأنه فى مصر

الدرس انتهى


الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

 

 

رباعيات
 

بحر الحياه مليان بغرقى الحياه
صرخت خش الموج فى حلقى ملاه
قارب نجاة .. صرخت .. قارب نجاة
قالوا مفيش
غير بس هوالحب قارب نجاة
عجبى !!!
***
فارس وحيد جوه الدروع الحديد
رفرف عليه عصفور وقال له نشيد
منين .. منين.. ولفين لفين .. يا جدع
قال من بعيد ولسه رايح بعيد
عجبى !!!
مرات أفوق ويحل عنى غبايا
وأفتكر إنى فهمت كل الخبايا
وافتح شفايفى عشان أقول الدرر
ما قولش غير حبة غزل فى الصبايا
وعجبي.
..
يا باب يا مقفول ... إمتى الدخول
صبرت ياما واللى يصبر ينول
دقيت سنين ... والرد يرجع لى : مين ؟
لوكنت عارف مين أنا كنت أقول
عجبى !!!
أنا قلبى كان شخشيخة أصبح جرس
جلجلت بيه صحيوا الخدم والحرس
انا المهرج , خفتوا ليه, قمتوا ليه
لا فى ايدى سيف ولا تحت منى فرس
وعجبي
ولدى نصحتك لما صوتى اتنبح
..
ما تخافش من جنى ولا من شبح ..
وان هب فيك عفريت قتيل اساله ..
ما دافعش ليه عن نفسه يوم ما اندبح ..
وعجبي
يأسك وصبرك بين ايديك وانت حر
تيأس ما تيأس الحياة راح تمر
أنا دقت من ده ومن ده وعجبى لقيت
الصبر مر وبرضه اليأس مر
عجبى
على بــعد ملـــيون مــيل من أرضنا
من الفــراغ الــكونى بصــيت أنـا
لا شفت فرق ما بين جبال وبحور
ولا شفت فرق ما بين عذاب أوهنا
عجبي
أنا كل يوم أسمع .. فلان عذبوه
أسرح ف بغداد والجزاير واتوه
ما أعجبش م اللى يطيق بجسمه العذاب
وأعجب من اللى يطيق يعذب أخوه
عجبي!!
أنا شاب لكن عمرى ألف عام
وحيد لكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى !!!!
انا كل يوم أسمع ........ فلان عذبوه
أسرح فى بغداد والجزاير واتوه
ما أعجبش م اللى يطيق بجسمه العذاب
واعجب من اللى يطيق يعذب أخوه
عجبى !!!

 

 

بحرى

آخر النهار هفهفت نسمة على الميّه
بعودا ليام على الجدعان وعليا
يا صيادين القاروص غيّه
رمى الشبك ع السمك له خِفيّه
طرحت طرحه لقيت فى الطرحة جنيّه
حلِّيت وعقدتهم على عينيا
ونزٍّلتنى القرار صرخ الشبار فيا
إرمى الشبك ع السمك يا واد بحنيّه
لا دق ع الباب وأقول للحلويا جارى
رمىْ الشبك صنعتى  والصبر دا كاري
أصبر على الرزق لما تمتلى بحاري
وأصبر على العشق لما تنطفى ناري
يا ميت ندامة على اللى البحر ما ادّاله
مفتوح عليه الحنك والكف مادّاله
عدّى الشطوط والخطوط اللنش عدى له
غفر السواحل يا صاحبى  مستعدا له
أنا مذهبى  الصبر واصبر حتى على تارى
واطعم شباكى  وصنارى بصباري
أنا أعوم على الصبر لما أوصل لأوطارى
والصبر دا مركبى  والقلع والصاري

 







الرابط الأساسي

الاكثر قراءة

تطابق وجهات النظر المصرية ــ الإفريقية لإصلاح المفوضية
«الدبلوماسية المصرية».. قوة التدخل السريع لحماية حقوق وكرامة المصريين بالخارج
6 مكاسب حققها الفراعنة فى ليلة اصطياد النسور
بشائر مبادرة المشروعات الصغيرة تهل على الاقتصاد
وسام الاحترام د.هانى الناظر الإنسان قبل الطبيب
الاستثمار فى التنوع البيولوجى يخدم الإنسان والأرض
الحكومة تستهدف رفع معدل النمو لـ%8 خلال 3 سنوات

Facebook twitter rss