صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

26 سبتمبر 2018

أبواب الموقع

 

ثقافة

إبداع

5 سبتمبر 2013

كتب : ايهاب كامل




شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبروننا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بمولد شاعر من طراز خاص هو الشاعر المصرى سيد حجاب  (مواليد 23 سبتمبر 1940)، و هو شاعر مصرى عرف بكتابة أشعاره باللهجة العامية المصرية للكثير من الأعمال الدرامية والتليفزيونية المصرية، وتغنى بأشعاره الكثير من المطربين، وله العديد من الكتابات للأطفال فى مجلتى سمير وميكي، كما حصل حجاب على جائزة كفافيس الدولية عن مجمل أعماله.
يصاحب قصائد حجاب لوحات للفنان العالمى بيتر بروجل (1525 - 1569) وهو رسام فلمنكى هولندى من القرن 16، عرف بلوحاته تصوّر مشاهد القرى والمواضيع الدينية والمناظر الطبيعية الريفية.

لروحنا نعود

وليل تباريحنا جارحنا.. نضيع وتضيع ملامحنا
نتوه في زحمة العالم.. ما نلقاش وشنا مالم
لروحنا نعود.. ونبقى احنا
حبيبي تعالى لسه العمر في ربيعه.. ونهر الحب في قلوبنا ينابيعه
حرام نعشق ونتعاهد.. ونتفرق ونتباعد
ويبقى بكرة بين ايادينا.. ونبيعه!
أنا في التوهة، في الزحمة.. باضيع ولا راحة ولا رحمة
تعالى انجدني من روحى.. ومن توهاني في جروحي
وخلي الكون يصالحنا
عينيك داري وحنان أهلى.. وفين ما باروح بتندهلي
تزهزهلي الحياة فيها.. وتتفسر خوافيها
نطير واحنا في مطارحنا!
وليل تباريحنا جارحنا.. نضيع و تضيع ملامحنا
نتوه في زحمة العالم.. ما نلقاش وشنا ما لم
لروحنا نعود.. ونبقى احنا


فى وصف مصر
سلوا قلبى وقولوا لى جوابا لماذا حالنا اضحى هبابا

لقد زاد الفساد وساد فينا فلم ينفع بوليس او نيابه

وشاع الجهل حتى ان بعضا من العلماء لم يفتح كتابا

وكنا خير خلق الله صرنا فى ذيل القايمة وف غاية الخيابا

قفلنا الباب احبطنا الشبابا فادمن او تطرف او تغابى

ارى احلامنا طارت سرابا ارى جناتنا اضحت خرابا

وصرنا نعبد الدولار حتى تقول له انت ماما وانت بابا

وملياراتنا هربت سويسرا ونشحت م الخواجات الديابه

ونهدى مصر حبا بالاغانى فتملؤنا اغانينا اغترابا

وسيما الهلس تشبعنا عذابا وتشبعنا جرائدنا اكتئابا

زمان يطحن الناس الغلابة ويحيا اللص محترما مهابا

فكن لصا اذن او عش حمارا وكل مشا اذن او كل كبابا

ودس ع الناس اوتنداس حتى تصير لنعل جزمتهم ترابا

امير الشعر عفوا واعتذارا لشعرك فيه اجريت انقلابا

وما نيل المطالب بالطيابه دى  مش دنيا يا شوقى بيه دى غابه

 


يا مصرى

يا مصرى ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصرى قوم هش الوطاويط.. كفاياك تبليط
صعبة الحياة والحل بسيط.. حبة تخطيط
فتحت باب استيرادك
وصرفت فوق ضعف إيرادك
حِلى للخواجة استكرادك
سابك بتقرا فى أورادك
وده قشّطك ونزل تشفيط
يا مصرى ليه دنياك لخابيط والغلب محيط
والعنكبوت عشش ع الحيط وسرح ع الغيط
ومهولاتى تحب تزيط
ساعة الفرح زغاريد تنطيط
وفى المياتم هات يا صويت
وفى المظاهرات سخن تشيط
وفى الانتخاب تنسى التصويت
يا مصرى ليه دنياك لخابيط والغلب محيط
والعنكبوت عشش ع الحيط وسرح ع الغيط
وليه بترشى وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
سهل وساهى وغبى وعبيط
يا مصرى ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصرى يا للى الغلا عاصرك
والنهب فى عصرك حاصدك
قوم للحياة واسبق عصرك
ولا حاجة هترجع مصرك
إلا ان تكون شغال ونشيط
يا مصرى ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصرى قوم هش الوطاويط.. كفياك تبليط
صعبة الحياة والحل بسيط.. حبة تخطيط

 

لو كنت أمير

من أمراء الحواديت
كنت ادى لكل فقير وفقيرة بيت
بيت بجنينة مليانة زهور
وبعشة مليانة كتاكيت
وأعلّق فوقه قمر بنور
ونجوم لولى... فتافيت فتافيت
لوكنت أمير
من أمراء الحواديت
كنت أدى لـ... وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى
لو كنت أمير
من أمراء الحواديت
كنت أدّى لكل الأطفال الحلوين ألعاب
قطر بقضبان.. فرشة ألوان.. مية أو زيت
وابنيلهم قصر على المالح من غير أبواب
قصر بقبة لولى وقبة مرجان
وأعلّق عالقبة أجراس
فضة ومرمر ودهب ونحاس
لكن قبل ده كلّه لو كنت أمير
من أمراء الحواديت
كنت ادّى لكل الناس
وردة وكتاب
وردة وكتاب
وكمان قبل ده كلّه
قبل ده كلّه
لو كنت أمير
من أمراء الحواديت
كنت أرفرف زى النسمة وادخل فى الحلق
وأقطّع نص السنة الخلق
نص اللى مابيقولش الحق
علشان يتعلمه
امتى يقولوا أيوة
وامتى لأ
ده لوكنت أمير
من أمراء الحواديت
 

السلم والكرسى

كل سلم آخره كرسى ... كل كرسى وله سلالم
إنجليزى ده يا مرسى ؟ ... لأ ده علم وله معالم
التسلق والوصول ... علم شغال له أصول
إن جهلته تعيش جهول .. وإن حفظته وكنت غول
وابن عالمة ح تبقى عالم
وهس ياد .. يا بت هسى
ده كل سلم آخره كرسى
فى القانون الانتهازى ...للوصول البرجوازى
مادة أولى : بيع ضميرك
ودن طين وعين إزازى
مادة ثانية : اربط مصيرك
باللى فوق برباط فولاذى
مادة ثالثة : دوس فى سيرك
على تحتيك وابقى نازى
والمهم اوزن ووازى
فين تنخ وفين ترازى
تئذى مين ومين تجازى
وامتى تبقى ذليل مسالم
وهس ياد .. يا بت هسى
ده كل سلم آخره كرسى
النظام .. لو كان يسارى
كون يسارى إرارى قارى
وامشى ع الخط اللينينى
واخنق السوق التجارى
ينقلب نظام يمينى
تبقى ليبرالى و إدارى
وافترض بقى حكم دينى
ابقى ارهابى انتحارى
واجلد اللى لابسه عارى
وأقنى فى السر الجوارى
زى جدك الانكشارى
اللى كان مهووس وظالم
وهس ياد ... يا بت هسى
ده سلم آخره كرسي


 







الرابط الأساسي

الاكثر قراءة

الأبعاد التشكيلية والقيم الروحانية فى «تأثير المذاهب على العمارة الإسلامية»
15 رسالة من الرئيس للعالم
هؤلاء خذلوا «المو»
الاستثمار القومى يوقع اتفاق تسوية 500 مليون جنيه مع التموين
رسائل «مدبولى» لرؤساء الهيئات البرلمانية
لمسة وفاء قيادات «الداخلية» يرافقون أبناء شهداء الوطن فى أول أيام الدراسة
الحكومة تعفى بذور دود القز من الجمارك لدعم صناعة الحرير

Facebook twitter rss