صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

15 نوفمبر 2018

أبواب الموقع

 

اتكلم

ورحلت غير مأسوف عليك يا أبوشرعية حمرا

5 يوليو 2013



 

اتكلم - محمود الشربيني

عن سي السيد محمد مرسي اتحدث، عن مندوب جماعة الاخوان المسلمين المحظورة اتحدث، عن الراجل اللي ارتكب كل الموبقات في السلطة في سنة واحدة ولما قالنا في خطابه ما قبل الاخير مش سنة كفاية انا قلت بصراحة لا يا مرسي سنة كتيييير اوووووي عليك، ومصر كبيرة اوي عليك انت وجماعتك الفاشية العنصرية الدموية.

سيادة المخلوع، بالاصالة عن نفسي، وبالنيابة عن الملايين من عاصري الليمون، شكرا جزيلا كثيرا لحد بعد بكرة يا كبير، شكرا لانك بجد عملت لشعب مصر خدمات جليلة كتيرة جدا، اولها انك يا باشا فهمتنا يعني ايه تيار اسلامي جهادي، ويعني ايه اتباع فكر سيد قطب من القطبيين، وكمان عرفتنا حجمهم في المجتمع وقدراتهم وخرجت اللي شبهك من اهلك وعشيرتك من السجون عشان تخوفنا بيهم وتخليهم يملوا علينا الدنيا تهديد ووعيد.

شكرا علي مجهودك الفظيع انت وجماعتك المحظورة عشان تظهروا علي حقيقتكم وتخلونا نعرف ليه الزعيم عبدالناصر والزعيم السادات والمخلوع مبارك كانوا رامينكم في السجون ومحرجين عليكم السياسة، وانتم نفسكم مكنتوش بتوع ثورة ولا دعاة ثورة زي ما قلت بلسانك انت شخصيا يا برنس، وأثبتم لينا انهم جميعا كانوا محقين، وخصوصا عبدالناصر وما ادراك ما الستينيات!.

اما بقا يا باشا تاني انجاز عظيم ومعجز، ان حضرتك دخلت شعب مصر موسوعة جينيس بأرقام قياسية فظيعة، اولها.. اننا اول شعب عمل ثورة لها عدة موجات في خلال سنتين ونص ازاحت رئيسين، الموجة الاولي ازاحت رئيساً كان يبدو ان مرجعيته ليبرالية، والموجة التانية والاخيرة، او اللي نتمني ان تكون الاخيرة الناجحة، ازاحت رئيساً مرجعيته اسلامية جهادية، وهي الثورة الاولي اللي تنجح في ازاحة نظام اسلامي من الحكم، والرقم القياسي التاني ان يوم 30 يونيو نزل فيه حسب تقديرات القنوات الاخبارية العالمية ما يزيد علي 30 مليون مصري.

يا من اطلقت علي نفسك مرشح الثورة وانت وجماعتك اول من تآمر علي الثورة، يا من كنتم اول من ترك الميدان بعد ان سجل نفسه اخر الحاضرين، يا من جلستم وتفاوضتم مع نائب الرئيس المخلوع لفض الميدان ليخرجوا هم بأقل الخسائر وتخرجوا انتم بأكبر المكاسب، اسمع بقا انكم ما عبرتم الي مجلس الشعب المنحل الا علي اجساد ودماء الثوار في مناسبات عديدة تشدقتم فيها بحب الوطن والحفاظ علي مكتسبات الثورة وكنتم في مجلسكم البغيض اكتر اللي اهان الثورة واول اللي صوت واقترع علي ان الشرعية مابقتش للميدان، وسكنتم في مساكن الذين ظلموا ثم اتبدل بيكم الحال لتخرجوا وتهتفوا ضد حلفائكم من العسكر وتتهمونهم بالانقلاب علي الشرعية!.

سيادة المخلوع ها هو الشعب يستدعي قواته المسلحة ويأمرها بالتدخل لعزلك وها انت حققت مصالحة تاريخية بين الشعب.. وشرطة الشعب، ورحلت غير مأسوف عليك يا أبوشرعية حمرا.

 

 







الرابط الأساسي

الاكثر قراءة

شباب يتحدى البطالة بالمشروعات الصغيرة.. سيد هاشم.. وصل للعالمية بالنباتات العطرية
اكتشاف هيكل عظمى لامرأة حامل فى كوم أمبو
بسمة وهبة تواصل علاجها فى الولايات المتحدة الأمريكية
كاريكاتير أحمد دياب
استراتيجية مصر 2030 تعتمد على البُعد الاقتصادى والبيئى والاجتماعى
المنتخب الوطنى جاهز غدا لاصطياد نسور قرطاج
مهرجان الإسكندرية السينمائى يكرم محررة «روزاليوسف»

Facebook twitter rss