صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

15 نوفمبر 2018

أبواب الموقع

 

اتكلم

ضرب رئيس الجامعة قلة أدب.. وتعليق الدراسة قلة حيلة.. والأمن حنين مع البلطجية

26 ابريل 2013

سمعتهم: هاجر كمال




 
شهدت جامعة عين شمس حدثًا خطيرًا جدا بعد ما قام الطلاب بالاعتداء على رئيس الجامعة بالضرب لانه اتأخر فى تنفيذ مطالبهم، الأمر اللى بيشير إلى تحول رهيب فى سلوك الطلاب واختلاف نظرتهم بشكل كبير للاساتذة والدكاترة عندهم فى الجامعة، اضافة إلى أنه دليل واضح على تحول مفهوم الاحتجاج السلمى إلى الاحتجاج العنيف.
 
«اتكلم» سألت شباب الجامعة عن رأيهم فى الاعتداء على رئيس الجامعة؟ وهل ده يمكن انه يندرج تحت مسمى الاحتجاج السلمى؟ وايه رأيهم فى قرار الجامعة بتعليق الدراسة؟ ايه سبب تباطؤ المسئولين عن وضع حل للازمة التى تشهدها الجامعة؟
 
«من علمنى حرفا صرت له عبدا» بالعبارة دى بدأ محمد سمير، طالب بكلية الالسن، كلامه لينا وقال: «الاعتداء على رئيس الجامعة شىء مرفوض لانه رمز للجامعة ازاى يكون التصرف معاه بالشكل ده؟ ثم انا فى الاول والاخر كطالب انا رايح الجامعة علشان اتعلم مش علشان ابلطج على الاساتذة، واللى حصل فى الجامعة من ضرب وعنف بيلغى كل اليات الاحتجاج السلمية، بس للاسف العنف بقى اسلوب حياة عند المصريين خصوصا بعد الثورة، والسبب الرئيسى فى الاحداث اللى بتحصل فى الحرم الجامعى ان الامن بيسمح بدخول الاسلحة للجامعة، وبيتحمل الامر ده برضه رئيس الجامعة لانه عارف كويس ان الامن الموجود هو امن ادارى غير مدرب على فض المنازعات، فتلاقيه بيكتفى بالحلول السلبية زى قفل البوابات لما تحصل خناقات ودا بيزود المشكلة مش بيحلها، وانا ضد تعليق الدراسة».
 
منار محمود، طالبة فى كلية اعلام، قالت: «التعدى على رئيس الجامعة بالضرب ميصحش حتى لو رئيس الجامعة غلطان فى تأخير اصدار قرار سريع بتوفير الامن، ومكمن الرفض ان فى اساليب تانية قانونية لمطالبة الطلاب بحقهم، لكن ان الطلاب يردوا على الغلط بالغلط امر مرفوض تماما، لان الاحتجاج بشكل سلمى قوى ومؤثر واحنا شفنا ايام الثورة قد ايه كان ليه تاثير، لكن الاعتداء حتى بالسب او الضرب ده لا يصح القول بانه سلمية».
 
ضياء الدين ابوالمعاطى، طالب فى هندسة مدنى، قال: «تعدى الطلاب على رئيس الجامعة اسلوب غير لائق مهما تجاهل فى الرد على مطالبنا، احنا لازم نحافظ على طريقتنا فى عرض حقوقنا، ولو دى بقت الطريقة ما المسئولين فى الجامعة يقدروا هما كمان يأجروا بلطجية تحميهم ودا حصل قبل كده فى كليات اداب وحقوق. وهو الامر اللى منحبش انه يحصل البلطجية يدخلوا الجامعة ويقفوا ضد الطلبة اللى استخدمت نفس الاسلوب فى التعامل مع الموقف وردت عليهم الامر إلى خللى يحصل اصابات بين بعض الطلبة فى الجامعة واللى ملهمش دعوة باى فاعليات فى الكلية».
 
فتحى احمد – طالب بكلية تجارة، قال: «تعليق الدراسة هو الحل الامثل لان رغم الشكوى من الاسر اللى بتعمل مشاكل فى الجامعة مبنلقيش اى رد فعل ايجابى من الجامعة او الاتحاد على الشكاوى دى، فكان لازم وقفة من الطلاب، لكن رغم كده انا ضد ضرب رئيس الجامعة او عميد حقوق، بس ارجع واقول التباطؤ فى رد الفعل هو اللى وصل الامور للشكل ده وتعليق الدراسة افضل حل فى الوقت الحالى لانه الفرصة الوحيدة اللى ممكن تهدى للاحتقان بين الطلبة، ولحد ما تقوم الجامعة بتوفير شركة امن».
 
 
ابانوب فؤاد، طالب فى كلية حقوق، قال: «ازاى ناس نازلة تغير فكر وتطالب باسقاط مسئولين ويتعدوا عليهم بالشكل ده، دى مش اخلاق ثوار ابدا، المسمى الوحيد للى حصل فى الجامعات المصرية عموما «دعارة سياسية» وانا شايف ان قرار الجامعة بتعليق الدراسة دا يعد قلة حيلة من رئيس الجامعة، وانه مش عارف يتصرف بعد مطالبة الطلاب باسقاطه علشان كدة علق الدراسة لاجل غير مسمى».
 
 محمد عبدالعليم، طالب بكلية هندسة قسم باور، قال: «السبب فى كل المشاكل دى ان الامن هو اللى سمح بدخول الاسلحة لجوه الجامعة وان علاقة الامن الودية مع البلطجية غير مقبولة، اضافة إلى ان تعامل الامن مع البلطجية بحنية هو اللى جمد قلب البلطجية وخلاهم مش هممهم حاجة لانهم واثقين انهم مهما عملوا الامن هيجى فى صفهم.