صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

16 يناير 2019

أبواب الموقع

 

اتكلم

سلك الحكومة ضرب

5 ابريل 2013



فعلا الحل الأمثل لمشاكل الحكومة اللى يقدر يضرب اكتر من عصفور بحجر واحد هو اللى قالته المستشارة لرئيس الجمهورية باكينام الشرقاوى على تويتر بالنص «فيما عدا المكتب الرئاسى وبعض الدوائر الهامة بقصر الاتحادية نبدأ من الغد قطع التيار الكهربائى لمدة اربع ساعات يوميا توفيرا للطاقة»، بصراحة حل عبقرى لكذا مشكلة تعانى منها الحكومة اهو بدل ما يعتقلوا المذيعين وبدل ما يقفلوا القنوات والناس تقول عليهم بيكمموا حرية الرأى والتعبير والذى منه اهو يلعبوا بنظرية ابقوا قابلونى لو اتفرجتوا على حاجة وبدل فشل قرار رئيس الوزاء هشام قنديل فى غلق المحلات الساعة العاشرة مساء ماعدا المحلات والمطاعم السياحية اهى باكينام طلعت بالحل السحرى هتقطع الكهربا كل يوم اربع ساعات.
 
الجميل فى الموضوع بقى ان فى نفس الوقت اللى باكينام هتفرض علينا قطع التيار الكهربى اسرائيل بتحتفل ببداية انتاج الغاز الطبيعى من بئر تمار اللى هو أصلا بئر غاز مصرى – يقع فى أزمة ترسيم الحدود- وهيخلى اسرائيل تأمن احتياجاتها من الغاز مدة طويلة لأ وممكن كمان يخليها من الدول المصدرة للغاز اللى كانت بتستورده مننا لحد وقت قريب.
 
الغريب بقى ان يطلع وزير السياحة يؤكد ان قطع الكهرباء عن مطار القاهرة مش هيأثر على السياحة قال ايه اغلب الرحلات اللى بتيجى بليل بتبقى على مطارات اقليمية يعنى مطار القاهرة ملوش لازمة بليل ولا ايه ؟ مش عارف شكلها كده موت وخراب ديار.
 






الرابط الأساسي

الاكثر قراءة

3 ضربات أمنية لملاحقة المزورين والمتلاعبين بالقانون
«أوبك» جديد فى شرق المتوسط القاهرة عاصمة للطاقة
أهــلاً بـــ «حيــاة كـريـمـة»
بريطانيا.. تستثمر فى مصر
مصير «جروس» على «كف عفريت» فى الزمالك
أتوبيس كهربائى لنقل الجماهير لأمم إفريقيا
صفوت زيس دافنشى القرن العشرين

Facebook twitter rss