صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

23 سبتمبر 2018

أبواب الموقع

 

ثقافة

ابداع

25 يناير 2013

اشراف: ايهاب كامل




 

فى مثل هذا اليوم منذ عامين بدأت ثورتنا المجيدة «ثورة 25 يناير» ضد الظلم والطغيان والحكم الشمولى مطالبة بأبسط حقوق الشعب المهدورة «عيش.. حرية.. عدالة اجتماعية» وبهذه المناسبة تحتفى صفحة الإبداع بهذا الحدث الجلل مع أجمل ما قيل من إبداع شعرائنا بمصاحبة رسومات لفنانى الجرافيتى للثورة.

ارفع راسك فوق

 

 

 

انت مصرى

ارفع راسك فوق

بلدك طالعة لفوق

ياللى كسرت الطوق

ياللى جبت نصرى

■ ■ ■

ارفع راسك همة

ياللى نصفت الأمة

أحبابك وشبابك

دول قد المهمة

من قوة شهيدهم

ربك خد بإيدهم

خمسة وعشرين.. عيدهم

ف يناير.. دا حصرى

ارفع راسك فوق

انت مصرى

■ ■ ■

ارفع راسك.. طير

ما بقاش فيه أساطير

كل العالم سامع

صوتك م التحرير

من كل الميادين

تونس وفلسطين

والباقيين.. جايين

وشايفهم ببصرى

ارفع راسك فوق

انت مصرى

■ ■ ■

لما مصر.. بتنطق

يعلا الحق ويسبق

والزيف يدخل جُحره

ولا بيحطش منطق

الراية.. مصرية

والأمة.. عربية

وادى ورد الحرية

فتح يا ابن عصرى

ارفع راسك فوق

انت مصرى

■ ■ ■

شعبى بصوته أدلى

عَدَل الدنيا.. عدلة

وف عز الشدايد

غيّرنا المعادلة

لو تزرع هاتجنى

أجمل نول.. ناسجنى

فقر الفكر.. سجنى

والعدالة.. قصرى

ارفع راسك فوق

انت مصرى

شعر: نصر الدين ناجى

 

 

 

إزاى

إزاى ترضيلى حبيبتى

أتمعشق اسمك وأنتى

عمالة تزيدى فى حيرتى وما انتيش حاسة بطيبتى إزاى ؟

مش لاقى فى عشقك دافع

ولا صدق فى حبك شافع

إزاى أنا رافع راسك وإنتى بتحنى فى راسى إزاى؟

أنا أقدم شارع فيكى

وآمالك م اللى باليكى

أنا طفل أتعلق بيكى فى نص السكة وتوهتيه

أنا لو عاشقك متخير

كان قلبى زمانه اتغير

وحياتك لفضل أغير فيكى لحد ما ترضى عليه

إزاى سيبانى فى ضعفى

طب ليه مش واقفة فصفى

وأنا عشت حياتى بحالها علشان ملمحش فى عينك خوف

وفى بحرك ولا فى برك

إزاى أحميلك ضهرك

وأنا ضهرى فى آخر الليل دايما بيبات محنى ومكشوف

أنا أقدم شارع فيكى

وآمالك م اللى باليكى

أنا طفل اتعلق بيكى فى نص السكة وتوهتيه

أنا لو عاشقك متخير

كان قلبى زمانه اتغير

وحياتك لفضل أغير فيكى لحد ما ترضى عليه

وإزاى ترضيلى حبيبتى

شعر نصر الدين ناجى

 

 

 

الأرض قد عادت لنا

ياسيدى الفرعون.. هل شاهدت أحزان المدينة

الناس تصرخ من كهوف الظلم..

والأيام موحشة حزينة

ومواكب الكهان تنهب فى بلاطك..

والخراب يدق أرجاء السفينه

والموت يرسم بالسواد زمانك الموبوء.

والأحلام جاحدة.. ضنينة

فى كل بيت صرخة

وعلى وجوه الراحلين تطل أنات دفينة

والجوع وحش كاسر

كالنار يلتهم الصغار.. ويستبيح الناس..

يعصف بالقلوب المستكينة

وقصورك السوداء يسكنها الفساد..

وصرخة الشرفاء..

بين يديك عاجزة سجينة

الناس فى الزمن الكئيب

تحب طعم الظلم.. تأنس للهوان..

وتحتمى بالموت.. تسكرها الضغينة

الشعب بين يديك ضاق بنفسه

كره الحياة.. ومل دنياه الحزينة

شعر فاروق جويدة

 

ارحل بقى

بحبك يا ريس وحبك يا ريس معكنن عليــه

مقطعلى قلبى مطلع عنيــــه

سيبونى فى حالى وبيا اللى بيـــــــه

دا كل اللى لية محرم عليـــــه

عشان حاجة واحدة عشــــــانك يا ريس

*********

بحبــــــــــك يا ريس

دى كلمة قالوها زمان من ســـــــــنين

وكل اللى قالها مطـيـن بطـيـن

يا سارق فلوسنا يا كاتم نفوسنا

يا واكل عرقنا برجلك دايسنا

ولســـــه بحبك واحب اللى حبك

وباحلف هاحبك واحب اللى جابك

فى يوم اغبر علينا ريس

******

مبارك يا ريس عليــــك البــــلد

لابنـــك وابنــــه وولد الولد

سوزانك سوزانا جمالك جمالنا

علائك علائنا وبكره وبعده وطول الامد

*********

غبــــاءك يا ريس ملوش حل خالص

وسايق ف الهبل وكلامك هجايص

ولولاك يا ريس مكنشى دا حالى

وحال كل مصرى مدروخ ولايـص

***********

قالوا العيشة حرة وهى العيشة مرة

ومش مـــر عادى

دا صبرك يا ريس ممرر بلادى

واسعار بترفع مأتنزلش مرة

وباين علينا هنطلع لبرة

رغيفك يا ريس بيصغر ما يكبر

وسعره يا ريس بيرفع ماينزل

سألنا دا ماله قالولنا الحديد

وايه العلاقة بسعره الجديد

تكونش يا ريس لغيت الدقيق

وبتطحن بداله برادة حديد؟

*********

مهو انت اللى عارف وسامع وشايف

جمالك قشــطنا وعز اللى خانا

وولـــع بلدنا برفع الحديد

**********

ماتصحى ياريس وصحى البلد

هنبقى يا ريس كمالة عدد

ف وسط العوالم وشعبى اللى هايم

وكبته اللى دايم وقرشه اللى عايم

هنبقى يا ريس كمالة عدد

واقولك واعيدلك لانى بحبك

نصيحة فصيحة نصيحة مريحة

شعر أحمد فؤاد نجم

 

 

الميدان

أيادى مصرية سمرا ليها فى التمييز

ممددة وسط الزئير بتكسر البراويز

سطوع لصوت الجموع شوف مصر تحت الشمس

آن الآوان ترحلى يا دولة العواجيز

عواجيز شداد مسعورين أكلوا بلدنا أكل

ويشبهوا بعضهم نهم وخسة وشكل

طلع الشباب البديع قلبوا خريفها ربيع

وحققوا المعجزة صحوا القتيل من القتل

اقتلنى قتلى ما هيعيد دولتك تانى

بكتب بدمى حياة تانية لأوطانى

دمى ده ولا الربيع الاتنين بلون أخضر

وببتسم من سعادتى ولا أحزانى

تحاولوا ما تحاولوا ما تشوفوا وطن غيره

سلبتوا دم الوطن وبشيمته من خيره

أحلامنا بكرانا أصغر ضحكة على شفة

شفتوش الصياد يا خلق بيقتلوا طيروا

السوس بينخر وسارح تحت أشرافك

فرحان بيهم كنت وشايلهم على كتافك

وأما أهالينا من زرعوا وبنوا وصنعوا

كانوا مداس ليك ولولادك وأحلافك

ويا مصر يا مصر آن العليل رجعتله أنفاسه

وباس جبين للوطن ما للوطن داسه

من قبل موته بيوم صحوه أولاده

إن كان سبب علته محبته لناسه

الثورة فيضان قديم

محبوس مشافوش زول

الثورة لو جد متبانش فى كلام أو قول

تحلب وتعجن فى سرية تفور فى القلب

وتنغزل فتلة فتلة فى ضمير النول

متخافش على مصر يا با مصر محروسة

حتى من التهمة دى اللى فينا مدسوسة

ولو أنت أبوها بصحيح وخايف عليها أوى

 تركتها ليه بدن بتنخره السوسة

وبيسرقوك يا وطن قدامنا عينى عينك

ينده بقوة الوطن ويقلى قوم

فينك ضحكت علينا الكتب بعدت بينا عنك

لولا ولادنا اللى قاموا يسددوا دينك

لكن خلاص يا وطن

صحيت جموع الخلق قبضوا على الشمس بأيديهم

وقالوا لا من المستحيل يفرطوا عقد الوطن تانى

والكدب تانى محال يلبس قناع الحق

بكل حب الحياة خوط فى دم اخوك

قول أنت مين للى باعوا حلمنا وباعوك وأهانوك

وذلوك ولعبوا قمار بأحلامك

نيران هتافك تحرر صحبك الممسوك

يرجعلها صوتها مصر تعود ملامحها تاخد مكانها القديم

والكون يصالحها عشرات السنين تسكونوا بالكدب فى عروقنا

والدنيا متقدمة ومصر مطرحها

كتبتوا أول سطور فى صفحة ثورة

وهما علما وخبرة مداورة ومناورة

وقعتوا فرعون هرب من قلب تمثاله

لكن جيوشه مازالوا بيحلموا ببكره

صباح حقيقى ودرس جديد أوى فى الرفض

أتارى للشمس صوت وأتارى للأرض نبض

تانى معاكم رجعنا نحب كلمة مصر

تانى معاكم رجعنا نحب ضحكة بعض

مين كان يقول ابننا يطلع من النفق

دى صرخة ولا غنى وده دم ولا شفق

أتاريها حاجة بسيطة الثورة يا أخوانا

مين اللى شافها كده مين أول اللى بدأ

مش دول شاببنا اللى قالوا كرهوا أوطانهم

ولبسنا توب الحداد وبعدنا أوى عنهم

هما اللى قاموا النهاردة يشعلوا الثورة

ويصنفوا الخلق مين عنهم ومين خانهم

يادى الميدان اللى حضن الذكرى وسهرها

يادى الميدان اللى فتن الخلق وسحرها

يادى الميدان اللى غاب اسمه كتير عنه وصبرها

ما بين عباد عاشقة وعباد كارهة

شباب كان الميدان أهله وعنوانه

ولا فى الميدان نسكافيه ولا كابتشينو

خدوده عرفوا جمال النوم على الأسفلت

والموت عارفهم أوى وهما عارفينه

لا الظلم هين يا ناس ولا الشباب قاصر

مهما حاصرتوا الميدان عمروا ما يتحاصر

فكرتنى يا الميدان بزمان وسحر زمان

فكرتنى بأغلى أيام فى زمن ناصر

شايل حياتك على كفك صغير السن

ليل بعد يوم المعاناة وأنت مش بتأن

شعر عبد الرحمن الابنودى

 

 

 







الرابط الأساسي

الاكثر قراءة

الأنبا يؤانس: نعيش أزهى عصورنا منذ 4 سنوات
المصريون يستقبلون السيسى بهتافات «بنحبك يا ريس»
الاقتصاد السرى.. «مغارة على بابا»
شكرى : قمة «مصرية - أمريكية» بين السيسى وترامب وطلبات قادة العالم لقاء السيسى تزحم جدول الرئيس
شمس مصر تشرق فى نيويورك
القوى السياسية تحتشد خلف الرئيس
تكريم «روزاليوسف» فى احتفالية «3 سنوات هجرة»

Facebook twitter rss