صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

23 سبتمبر 2018

أبواب الموقع

 

ثقافة

فى ذكرى ميلاد عبد الناصر والسد العالى

18 يناير 2013



 

يا ناصـر

يا ناصـر

يا حريـة

يا وطنيـة

يا روح الأمـة العربية

يا ناصر .. الشعب يريـدك

يا ناصر .. وايدينا فى ايـدك

نبنى سوا ليام الجايـة

الشعب يريـدك يا حياته

يا موصل موكبـه لغاياته

وحياة المصحف وآياتـه

اسمك فى قلوبنـا أغنية

... يا ناصـر!

وحياة الثـورة وغلاوتها

وحياة الخضـرة وحلاوتها

وحياة الشـدة وقسوتها

كلنا وياك وحـدة قوية

... يا ناصـر!

يا بناى السـد العالى

والكهربا فى الـريف بتلالى

يا مُخْلص يا عظيـم يا مثالى

تحميك القدرة الإلهيـة

يا حريـة

يا وطنيـة

يا روح الأمـة العربية

يا ناصـرا!

شعر صلاح جاهين 

الله يجازيك يا عم عبد الناصر

 

الله يجازيك يا عم عبد الناصر

الليل مليّل

والألم عاصر

لسه اللى بيبيع أمته كسبان

وكل يوم

أطلع أنا الخاسر

=========

أما أنت خميت مصر دى خمة

يوم ما ناديت بالعشق للأمة

ورطتنا نعشق خريطة عبيطة

وبشر ما نعرفهاش

وبلاد.. ما بنزورهاش

إلا.. فواعلية وبنايين وسواقين

وخدامين.. وطباخين.. وكناسين

بلاد أسافرها سعيد

أرجع حزين

حبيتها زى ما قلت لى.. وأكتر

ع الأجنبى ما استكترتش.. عليا تستكتر

ع الأجنبى ما اتنقورتْش عليا تتنقور.

تطمع فى دمعى

وف تعاسة راتبى.

مُلهم أنا.. وأعمل غبى

وأدى الألم يا عم عبد الناصر

زاحف وبيحاصر

وآدى الجميع خاسر

وآدى فجر أمتنا الجميل مغلوب

وآدى انتحار الأمة بالمقلوب

وأنا… غريب الدار..

لابسنى توب العار

ساكن فى وطنى بالإيجار

=========

قاعد أنا ع الجسر فى القيَّالة

من قلب اللهيب مِنشالة

وقلبى.. ساقية حزن سَيالة

باغنى..

ما أعرف مغنى وألاّ عديد

زى افتكار الميتين.. فى العيد.

باعانى وحدانى

شياطينى لابسانى

والأمة قدامى.. مفارقانى

يا رب…

ما تحببنى فى الناس الملاح تانى

يا رب

ما ترجعنى أعشق

ضحكة إخوانى

يا رب

كرهنى فى أوطانى

 

 

 

 

 شعر عبد الرحمن الابنودى

 

السد

 

حين ألوى بعهده مقرض المال وحاد الصديـق عنـا ومالا

واستدار التاريخ ينظر هــل يستسلم الليث أم يصول وصالا

قال إنـــى بانيـــه وأعتـــز بالله وبالحق فاسترد القنالا...

قالها من صميم أفئدة الشعـب فكانـت أقوالـه ... أعمالا

وإذا هبت الشعوب إلى الغايات شقـت لنيلهــن ... الجبال

كان حلما فخاطر فاحتمالا ثم أضحى حقيقة لا خيالا

عمل من روائع العقل جئناه بعلم ولم نجئه ارتجالا

إنه السد فارقبوا مولد السد وباهوا بيومه الأجيالا

يفتح الرزق وهو سد فينساب جنوبا فى أرضنا و شمالا

ويشيع الحياة تنبض نبتا يغمر الجدب نوره والرمالا

ويبقى النهر نزوة المسرف يلهو فينثـر الأموالا

حقق المعجزات عزم جمال فاحمدوا الله إن حباكم جمـالا

هو والنيل واهبا السد هــذا سالا تبرا

وذلك فاض نضــــالا

 

 شعر عزيز أباظة

 

عاش الجــيل الصاعد

عاش الجــيل الصاعد ... عاش

جيل من شعب مجاهد .... عاش

عاش يبنى ويجاهد   عاش بكفاحه الخالد

راجل واحد مبدأ واحد

عاش جيل ثورتنا عاش

عاش الجندى يوم  ما حطم شوكة الاسـتعمار

كان عنوان النصر الثورى فى كل بلد أحرار

وسـمعناه بيقولها قوية باسم مبادئ أمة أبيّة

أنا خط هجوم ودفاع  أنا رمز سلام وصراع

أفدى بالروح وأعيش فى النصر بطل وشجاع

حيوا معاي  قولوا معايا

عاش الجندى العربى عاش

 

عاش الزارع يوم الشمس ما حست بيها عينيّ

فرشت نورها وكبر الزرع  وهو مدارى عليّ

وسمعناه بيقولها قوية أرض ولادى ورجعت ليّ

حرمونا سنين وســــنين  وافتكروا الناس نايمين

وطلعنا عليهم يوم خلصنا حقوق ملايين

حيوا معاي  قولوا معاي 

عاش فلاح الثورة عاش

 

عاش الفن حضارة لأمة يبنيها الفنان

يروى حياتها فى غنوة فى كلمة

فى صورة بروح وإيمان

وســمعناه بيقولها قوية  مجد بلادى عهد علي

قلبى وروحى ملك لفنى والاتنين لبلادى هدية

حيوا معاي  قولوا معاي 

عاش الفن رسالة عاش

 

 شعر حسين السيد

  

 

حكاية شعب

 قلنا هنبنى وادى احنا بنينا السد العالى السد العالى

يا استعمار بنيناه بأدينا السد العالى

من أموالنا بأيد عمالنا

هى الكلمة وادى احنا بنينا

قولنا هنبنى وادى احنا بنينا السد العالى

إخوانى

يا استعمار بنيناه بايدينا السد العالى

إخوانى.. تسمحولى بكلمة.. (ايه)

الحكايه مش حكاية السد

حكاية الكفاح اللى ورا السد

حكايتنا احنا.. حكاية شعب

للزحف المقدس.. قام وثار

شعب زاحف خطوته تولع شرار

شعب كافح وانكتبله الانتصار

تسمعوا الحكاية؟.. بس قولها من البدايه

هى حكاية حرب وتار بينا وبين الاستعمار

فاكرين لما الشعب اتغرب جوه فبلده

آه فاكرين

والمحتل الغاصب ينعم فيها لوحده

مش ناسيين

والمشانق للى رايح واللى جاى

ودم احرارنا اللى راحوا فى دنشواى

من هنا كانت البداية

وابتدى الشعب الحكاية

كان كفاحنا بنار جراحنا

يكتبه دم الضحايا

انتصرنا .. انتصارنا

يوم ما هب الجيش وثار

يوم ما أشعلنا ثورة له ونار

يوم ما أخرجنا الفساد

يوم ما حررنا البلاد

يوم ما حققنا الجلاء

انتصرنا.. انتصرنا

رجعت الارض الحبيبة الطيبة لايدين صحابها

التقينا العز فيها والكنوز تايها فى ترابها

قولنا نلحق نبنى مستقبلها ونرجع شبابها

نعمل ايه

كان طبيعى نبص للنيل اللى ارواحنا فى ايده.. ميته فى البحر ضايعة والصحارى فى شوق اليه

قولنا نبنى سد عالى.. سد عالى

بص الاستعمار صعب حالنا عليه

ليه نرجع مجدنا ونعيده ليه

راح على البنك اللى بيساعد ويدى

قاله حاسب

قالنا مالكمش عندى .. قولنا ايه

كانت الصرخة القوية فى الميدان

فى اسكندرية صرخة اطلقها جمال

واحنا أممنا القنال

ضربة كانت من معلم.. خلى الاستعمار يسلم

والحصار الاقتصادى .. جاب سلاحه

طيارته.. غوصاته.. دباباته

واعتدى علشان نسلم .. كنا نار اكلت جيوشهم

نار تقول هل من مزيد.. وانتصرنا

ولسه عارهم ذكرى فى تراب بورسعيد

والعروبة فكل دار وقفت معانا

والشعوب الحرة جت عا للى عدانا

انتصرنا

ادى حكاية الشعب .. شعب للزحف المقدس

قام وثار

شعب زاحف

خطوته تولع شرار

شعب حققله جمال الانتصار

قولنا هنبنى وادى احنا بنينا السد العالى

يا استعمار بنيناه بايدينا السد العالى

 

 

 

 

 شعر أحمد شفيق كامل

 

 فى ذكرى عبد الناصر

 

حتى الرسول مات وأمر الله لابد أن يكون 

بس الفراق صعب واحنا شعب قلبه حنون

وحشتنا نظرة عيونك للبلد ياجمال

والحزم والعزم فيها وحبنا المكنون

وحشتنا عبثة جبينك وأنت بتفك

ونبرتك وانت بتعلمنا وتفسر

وبسمة الود لما تواجه الملايين

وقبضة اليد لما تدق ع المنبر

وقبضة اليد لما تلاطم الجرانيت

وترفع السد عالى المجد عالى الصيت

وتأدب النيل وتحكم مية الفيضان

ما تعدى نقطة سوى بالخطة والتوقيت

وبقيت أقول : مية الفيضان واحشانى

سبتمبر إزاى بدونها يكون يا خلانى

يا ويلى من دا طلب ويا ريتنى ما اتمنيت

لبى الزمن منيتى من دمع أشجانى

وعاد لسبتمبر الفيضان دمع هتون

ينصب م القلب ويهيم فى النسيم محزون

يميل نخيل الرطب على بعضه بالهمسات:

حتى الرسول مات.. مات.. وأمر الله لابد يكون!

 

 

 شعر صلاح جاهين

 

 

 

 

 

 من قصدية _ رسالة الى جمال عبد الناصر

والدُنا جمالَ عبدَ الناصرْ:

عندى خطابٌ عاجلٌ إليكْ..

من أرضِ مصرَ الطيبة

من ليلها المشغولِ بالفيروزِ والجواهرِ

ومن مقاهى سيّدى الحسين، من حدائقِ القناطرِ

ومن تُرعِ النيلِ التى تركتَها..

حزينةَ الضفائرِ..

عندى خطابٌ عاجلٌ إليكْ

من الملايينِ التى قد أدمنتْ هواكْ

من الملايين التى تريدُ أن تراكْ

عندى خطابٌ كلّهُ أشجانْ

لكنّني..

لكنّنى يا سيّدي

لا أعرفُ العنوانْ…

والدُنا جمالَ عبدَ الناصرْ

الزرعُ فى الغيطان، والأولادُ فى البلدْ

ومولدُ النبيِّ، والمآذنُ الزرقاءُ..

والأجراسُ فى يومِ الأحدْ..

وهذهِ القاهرةُ التى غفَتْ..

كزهرةٍ بيضاءَ.. فى شعرِ الأبَدْ..

يسلّمونَ كلّهم عليكْ

يقبّلونَ كلّهم يديكْ..

ويسألونَ عنكَ كلَّ قادمٍ إلى البلدْ

متى تعود للبلد؟...

 

 شعر نزار قبانى

 

 

رسوم الحسين فوزى _جمال كامل

 







الرابط الأساسي

الاكثر قراءة

شمس مصر تشرق فى نيويورك
شكرى : قمة «مصرية - أمريكية» بين السيسى وترامب وطلبات قادة العالم لقاء السيسى تزحم جدول الرئيس
الاقتصاد السرى.. «مغارة على بابا»
تكريم «روزاليوسف» فى احتفالية «3 سنوات هجرة»
القوى السياسية تحتشد خلف الرئيس
وانطلق ماراثون العام الدراسى الجديد
55 قمة ثنائية و 9 جماعية عقدها «السيسى» على هامش أعمال الجمعية العامة

Facebook twitter rss