صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

26 سبتمبر 2018

أبواب الموقع

 

اتكلم

العمدة.. والحزق الإسلامى المستجد

11 يناير 2013



فى مقطع فيديو موجود على موقع "يوتيوب" عبارة عن جزء من برنامج دينى فى قناة الحافظ الدينية برضه، الفيديو لعضو مجلس الشعب السابق الاخوانجى محمد العمدة واللى قال فيه بالفم المليان: "احنا اللى حنحكم مش حمدين والبرادعى ووحيد ولا اى كلب من الكلاب دى اللى عايزة تحكم الدولة"... و"الايام الجاية الكل هيمشى على المبادئ والقيم الاسلامية.. كل المؤسسات الاعلام والقضاء حيمشى غصبا عن عين امه على هذه القيم.. الكلاب دى كلها لازم تخش جحورها"... و"يوم 25 يناير الجاى انا بادعو كل القوى الاسلامية تنزل الشوارع من اسكندرية لاسوان.. كل مواطن شريف لازم يبقى فى الشارع، بقبضته بعصايته باى حاجة عشان اى ابن كلب مايروحش عند اى مؤسسة".

دى كانت مقتطفات سريعة من اللى قاله النائب المحترم محمد العمدة.. فى خضم دفاعه عن الاسلام وقيم الاسلام اللى لازم المؤسسات تمشى عليها (بحسب تاكيده)، واللى أشار بشكل واضح إلى استخدام العنف ضد أى حد يخالف كلامه ودعا المواطنين للاستعداد والاحتشاد للدخول فى حرب أهلية ضد (ولاد الكلب)!!.

سيبوكم من الهلفطة والبذاءات اللى استخدمها العمدة فى كلامه واللى بتدل على انه شخص عدوانى اجوف ملهوش قضية وبيرسخ مفهوم البلطجة تحت فكرة الدفاع عن الاسلام وقيمه، فى حين ان الهدف هو ترسيخ قواعد جماعته واخونة الدولة، واللى هى بعيدة تماما عن مفهوم الدين الصحيح بدليل كم الشتائم اللى ملى بيها اسماع المشاهدين.

طنشوا كل ده  وارموه  ورا ضهركم، انا عايز اسأل سؤال واحد، هو مين محمد العمده علشان يتكلم ويهاجم حمدين صباحى او محمد البرادعى؟؟ هو كان فين الاخ ده قبل الثورة؟.

الثورة دى انتجت شئ عجيب جدا وهو ان حفنة من المدعين والمتهجمين بدأوا يتكلموا عن الكفاح السياسى فى حين انهم ايام نظام مبارك عمر ما صوتهم ارتفع بالهتاف ضده!!.

جماعة الاخوان المسلمين اصلا تنظيم عمره ما كان ليه قضية وطنية، صحيح هما اتحبسو واتسجنو واعتقلوا بس مش علشان خاطر قضية وطنية، ولا علشان خاطر مصر، الاخوان كانوا بيتسجنوا فى ظل كفاحهم لتطبيق اجندتهم الخاصة، دا بدأ يظهر فعلا لما وصلوا للحكم، ظهر اقتصادهم الخاص وعلاقاتهم الخاصة بأمريكا وقطر، ودستورهم الخاص اللى فرضوه على الشعب، وليهم برضه اسلوبهم الخاص فى الاعتداء على الشرفاء مستخدمين الدين ذريعة فى ضربهم.

حمدين صباحى والبرادعى وغيرهم من الاشخاص اللى كانوا فى صفوف المعارضة ايام مبارك - مع تأكيد اختلافى على عدم جدوى بعضهم فى الحياة السياسية، فى رأيى - الا ان اقل واحد فيهم كان ليه مواقف رافضة للظلم والاستبداد اكتر من النائب السابق محمد العمدة، مع الاحترام للجميع.

ودلوقتى عايز اسأل النائب العمدة.. كانت فين عزيمتك وحرقتك على الاسلام وتطبيقه ايام نظام مبارك؟؟، مشوفتكش مرة حزقت فى الكلام فى مجلس الشعب وهاجمت سياسات مبارك، وكان فين الحزق والنتع اللى عملته على قناة الحافظ ايام الثورة؟، مكنش فى حزق ولا نتع للأسف، كل ده كلام مستجد لما ركبوا الحكم، قبل الثورة كان فى "تنسيق مع "الوطنى" وتفهمات مع الامن وكان زكريا عزمي ويوسف بطرس غالي وأبو النجا رموز وطنية ومحترمين"، (وده باعتراف الرئيس محمد مرسى فى حوار ليه فى جريدة المصرى اليوم بتاريخ (25 /11/2010)، واعتقد ان النائب العمده دخل مجلس الشعب فى 2005 فى صفقة الـ 88 اخوانجى، مش كده برضه؟

الواضح انهم نسيوا.. بس احنا مش بننسى.

المحرر

[email protected]

 

 

 

 

 







الرابط الأساسي

الاكثر قراءة

الحاجب المنصور أنقذ نساء المسلمين من الأسر لدى «جارسيا»
وزير المالية فى تصريحات خاصة لـ«روزاليوسف»: طرح صكوك دولية لتنويع مصادر تمويل الموازنة
الدور التنويرى لمكتبة الإسكندرية قديما وحديثا!
جماهير الأهلى تشعل أزمة بين «مرتضى» و«الخطيب»
قمة القاهرة واشنطن فى مقر إقامة الرئيس السيسى
يحيا العدل
مصر محور اهتمام العالم

Facebook twitter rss