صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

24 سبتمبر 2018

أبواب الموقع

 

اتكلم

face 2 face

9 نوفمبر 2012

كتب : نهى عابدين




هبة: بشتغل 3 وظائف.. وثقافة التطوع في مصر مهزوزة.. وبحاول أساعد الناس

هبة ودعاء بنتين شغالين في وظايف حكومية، لكنهم مختلفين في حاجات تانية، كل منهم بتواجه الحياة بطريقتها، وبتحاول تكون أحسن، ورغم العواقب اللي بتقابلهم الا انهم بيحاولوا جاهدين انهم يبقوا في حياة أفضل، ولكل منهم طريقة هتشفوها في المواجهة دي.

■ عرفينا بنفسك؟

- هبة فاروق، تخرجت في كلية اداب قسم اجتماع جامعة القاهرة دفعة 2009،  بشتغل موظفة في إحدي الهيئات الحكومية، لكني ما اكتفتش بكده وأسست مبادرة اسمها «شيزوفرينيا» لتنمية الشباب، اضافة لمساهمتي في مراقبة الامتحانات في إحدي الشركات التعليمية.

■ ازاي بتفكري تستغلي وقت فراغك؟

ـ معنديش وقت فراغ انا بشتغل في إدارة الموارد البشرية في الهيئة من الصبح لغاية الضهر، ده إلي جانب اني بحضر دبلومة في إدراة الأعمال، وبشرف علي مبادرة «شيزوفرينيا» اللي بحاول من خلالها اساعد الناس في التعرف علي نفسها بشكل اعمق، وتحديد الوظيفة اللي تناسبها، لان أغلبهم مش عارف هو عايز ايه ولا عنده ادراك بقدراته اللي ممكن يستغلها لتغيير حياته.

■ العمل التطوعي مهم في حياة الشباب؟

طبعا مهم جدا، بس للاسف ثقافة التطوع مهزوزة في مصر، لان الجمعيات الأهلية معندهاش نظام عملي للاستفادة من قدرات الشباب المتطوعين،  كل المبادرات أو الجمعيات بيبقوا عايزين يستغلوا المتطوع، وده اللي خلاني اتوقف عن العمل التطوعي واعمل مبادرة خاصة بيا.

  كلمينا عن المصاعب اللي قبلتك في الحياة؟

ـ أنا، الحمد لله، عندي اصرار وده اللي خلاني اشتغل في 3 حاجات في وقت واحد علشان لما اوصل لسن 30 سنة اكون قادرة علي تحقيق اللي أنا عايزاه، ويكون ليا مكانة كويسة في المجتمع، مثلا لقيت من الصعب اني التحق بدبلومة إدارة الأعمال بكلية التجارة ولكني فضلت ادور لغاية ما حققت اللي أنا عاوزاه.

  وتعليق اهلك علي حياتك إيه؟

ـ هما واثقين في اللي بعمله طبعًا، صحيح بيبقوا مستغربين خطواتي في الحياة في البداية وبيخافوا عليا لكن في النهاية بيشجعوني، خصوصًا والدي، وبيفرحوا لما بيشوفوا نتيجة شغلي ومجهودي.

دعاء: إخصائية اجتماعية.. ومختلفة مع أهلي في التفكير.. وبقضي باقي يومي نوم و«نت»

■ عرفينا بنفسك؟

ـ اسمي دعاء احمد، خريجة معهد خدمة اجتماعية، وبشتغل اخصائية اجتماعية في مدرسة حكومية من حوالي 4 سنين.

■ ازاي بتفكري تستغلي وقت فراغك؟

ـ أنا برجع من المدرسة الساعة 4 تقريبا وبقضي باقي اليوم ما بين نوم و«نت» اتابع اخبار، افتح موقع «فيس بوك» اتكلم مع اصحابي، لكني بحس اني مش عارفة استغل وقتي في حاجة مفيدة تساعدني علي اني ابقي في حياة افضل، وبفكر ساعات اني انزل اتطوع في اي جمعية خيرية اساعد فيها الناس بس المشكلة اني ممكن معرفش اوفق بين مواعيد الشغل والجمعية الخيرية.

■ العمل التطوعي مهم في حياة الشباب؟

ـ اكيد خصوصا  للشباب اللي العاطل لازم يستغلوا وقت فراغهم في خدمة المجتمع ومساعدة الناس، وده اكيد حيعود عليهم بفايدة كبيرة وممكن يفتح لهم باب رزق كمان، اما البنات اللي تقدر توفق بين حياتها والتطوع  تبقي جدعة، لانه هيساعدها انها تكون شخصية انضج اكيد.

■ كلمينا عن المصاعب اللي قبلتك في الحياة؟

ـ كل اللي حوليا كانوا رافضين اني انزل اشتغل وبيقولوا كفاية الدراسة عليا، لكن انا كنت محتاجة اني انزل اشتغل علشان قعدة البيت مملة وفضلت اتكلم معهم واتناقش لغاية ما اقنعتهم انهم يسبوني انزل اشتغل، بس ده اخد مني وقت، لكن الحقيقة شغل البنت بقي مهم دلوقتي زي الولد بالظبط.

  وتعليق اهلك علي حياتك ايه؟

ـ هم بيخافوا علي علشان كدا بيتدخلوا في اغلب تفاصيل حياتي، لانهم عايزني اكون حاجة كويسة، بس من وجهة نظرهم هما.. يعني طريقة تفكيري غير طريقة تفكيرهم، ودا سبب الاختلاف.







الرابط الأساسي

الاكثر قراءة

مندوب اليمن بالأمم المتحدة: موقف مصر من قضيتنا عروبى أصيل يليق بمكانتها وتاريخها
مشروعات صغيرة.. وأحلام كبيرة
وزير الاتصالات يؤكد على أهمية الوعى بخطورة التهديدات السيبرانية وضرورة التعامل معها كأولوية لتفعيل منظومة الأمن السيبرانى
موعد مع التاريخ «مو» يصارع على لقب the Best
القاهرة ـــ واشنطن.. شراكة استراتيجية
«المصــرييـن أهُــمّ»
عبدالله بن زايد لـ«روزاليوسف»: المباحثات مع الرئيس السيسى كانت إيجابية للغاية

Facebook twitter rss