صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

18 سبتمبر 2018

أبواب الموقع

 

ثقافة

واحة الإبداع: كان هنا راجل

24 ديسمبر 2015



ماهر مهران

اللوحات بريشة الفنان سامى أبوالعزم

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة «على ألا تتعدى 055 كلمة» على الإيميل التالى:    


كان هنا راجل سبع زى الوحش
راجل راجل عمره ما كان هلس
عدوُّه .. سواد الليل
عشقه .. زقزقة الطيور فى الصبح
ومزاجه فى الحنجلة والمعيقة
ولمة النَّاس حواليه فى الرهبة
أو حوالين جرون القمح
كان فيه راجل وشه يتكسى بالسواد
لو قالوله : فلان خاصم فلان
ووشه يبقا كهرمان لمَّا يعمل صلح
يداوى الصدا بالندى
وميلة الزمان بالكلام العسل
كان فيه راجل بيكره عمى الكسل
ويستمتع بالوقفة مع الغلبان
كان فيه راجل حنيِّن قوى وإنسان
له وش صبوح وقلب للجميع مفتوح
وكلمته فى الحق زى السيف
راجل ساكن فى القلوب مش ضيف
لا عين لمحته جاى على ولية
ولاسمعنا فى مرَّة  إنه عمل عملة مش هيَّ
راجل يشبه الخيِّة اللى بتلم الخلايق
وبتكسر الأنجاس وتطمِّن الخايف
راجل بنفهمه من حركة الشفايف
وكلنا نقوله : آمين راجل وكان زين
يتعب قلبه عشان الجميع يرتاح
وزى العطر مابيفوح فاح  وراح
راح زى الرجال الدهب
وجم عيال العجب راح زى الرجال الجمال
وجه عيال الاختلال
خال ولا خلخال؟ عم ولا غم؟
مين سيَّل دمنا فى المفارق؟
ومين هايلم؟
مين يطبطب ع الولايا؟
مين يداوى البلايا؟
مين يتحمَّل الزعلان؟
مين يبل الرِّيق النَّاشف؟
مين يقول للمفترى اختشي؟
مين يملا عين المرتشي؟
مين يعلِّم اللى هايشيلونا بكرة ع الأكتاف
إن لحمنا واحد
وإن دمنا واحد
وإن حلمنا واحد
وإن الوجع وجع واحد
وإن الرجولة مش إننا
ناكل زى الدود فى بعض
وبجهل نسقى شجر الحزن
وبغشم ندهش كل يوم فى الورد
ونتعارك ونتشابط ونناهد
وما ناخدش بالنا من واحد
واحد مننا راجل
رمى التفاهة ورا ضهره
وراح يا سعده
يحمى الرمال التلج
يحارب فى عز الصهد
يحمى البلاد والعباد والأرض
ويمحى الجراد
ويواصل
فـ يقول اللى هايشيلونا بكرة ع الأكتاف:
كان هنا راجل
سبع زى الوحش
راجل راجل
يمرس الزَّلط مرس!!







الرابط الأساسي

الاكثر قراءة

قبيلة الغفران تجدد الشكوى إلى المفوضية السامية ضد همجية «نظام الحمدين»
الخيال العلمى فى رواية «الإسكندرية 2050»
900معلمة بـ«القليـوبية» تحت رحمة الانتـداب
خريطة الحكومة للأمان الاجتماعى
الكاتبة الفلسطينية فدى جريس فى حوارها لـ«روزاليوسف»: فى الكتابة حريات تعيد تشكيل الصورة من حولنا
«محافظ الجيزة» بالمهندسين بسبب كسر ماسورة مياه.. و«الهرم» غارق فى القمامة !
السفير محمد إدريس مندوب مصر الدائم لدى الأمم المتحدة فى نيويورك لـ«روزاليوسف»: بيان القاهرة يؤسس لإعلان سياسى هو الأول من نوعه فى حفظ السلام

Facebook twitter rss