>



صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

14 نوفمبر 2018

أبواب الموقع

 

المقالات

إحنا كبار قوى يا سيد

15 مارس 2014

بقلم : خالد جلال




ديك النهار (أموت وأعرف يعنى ايه ديك دى) كان يوم عودة الاحتفال بعيد الفن فى أكبر مسارح مصر دار الاوبرا المصرية وبحضور السيد الرئيس الوقور سيادة المستشار عدلى منصور والمشير عبدالفتاح السيسى ورئيس الوزراء ابراهيم محلب ووزير الثقافة د.محمد صابر عرب وصالة جمهور فيها اكبر وأعظم فنانين من كل الفنون فى مصر قعدت ف نص الصالة وشفت فنانى مصر ورأس الدولة بيكرمهم بنفسه وبيمنحهم الاوسمة اللى تليق بفنهم البديع للحظات دموعى فرت منى يا نهار مش فايت مين اللى يبقى عنده كوووووول دول ويخاف ومين اللى حاول الوقت اللى فات يحسسنا اننا صغيرين وان فيه ف الفن اللى ممكن يسبقنا مين اللى حاول يحسسنا اننا ف ازمة مين اللى شكك ف قدرتنا على النهوض مين اللى حاول يحبط من عزيمتنا مين اللى حاول يضعف قوتنا مين اللى حاول يفرقنا مين اللى حاول يدخلنا ف متاهة صعب الخروج منها مين اللى حاول ينسينا تاريخنا مين اللى جرب يحسسنا بالاحباط ويسخر من فننا يا نهااااار مش فايت ف حتة واحدة جزء من فنانينا من كل الاجيال يحلوا من على حبل المشنقة خد عندك يا سيدى على سبيل المثال (اللى لحقت اشوفهم وكان فيه اكتر) فاتن حمامة، ماجدة، محمود ياسين، عزت العلايلى، صلاح السعدنى، فاروق الفيشاوى، سميحة أيوب، يسرا، ليلى علوى، حسين فهمى، جمال بخيت، احمد شيحا، جمال سلامة، هانى رمزى، محمد عبدالعزيز، حسن يوسف، محمد فاضل، فردوس عبدالحميد، شريف مندور صبرى فواز، منال سلامة، هانى سلامة، صفاء أبوالسعود، هالة صدقى، سماح أنور، عبدالرحمن ابوزهرة، محمد سلطان، وجدى الحكيم، حسين العزبى، أشرف طلبة، أنغام، هانى شاكر، وغيرهم وغيرهم يا خبااااااااااار كل دول ف حتة واحدة امال لو طلعنا بالباقى بقى كان ها يحصل ايه... كنت اما اقول للناس انا متطمن كانوا يقولوا متطمن من ايه ويستعيروا جملة البديع وحيد حامد (احنا صغيرين قوى يا سيد) اقول ابدا مصر كبيرة اقروا التاريخ وبدروس صربيا اللى اتعلموها كانوا يردوا كان زمان اهوده اللى احنا فالحين فيه... وكنت برضوا أقول دروس التجريث والسخرية وقلة القيمة وكسر الهيبة مكانها أى حتة الا هنا مصر محدش قدر عليها طول عمرها كله حاول ومن كل مكان يهدها وفشل كانت دايما بتقوم اقوى م الاول مصر بلد وشعب مالهومش كتالوج تبهرك تدهشك تيجى تحاول تهدها تقولك بص العصفورة تقوم تلف انت (وانت ونصيبك بقى) بس هانعديها تلسعك على قفاك وتقولك كان غيرك اشطر يا كوكوولما غنت انغام بكيت وانا باسمعها بتقول (بلدى التاريخ لما بيتكلم عليها يقوم يقف وينحنيلها احترام....بلدى اللى وقت الشدة دايما ف النهاية بتنتصر... واللى محدش جه عليها ف يوم الا وخسر... بلدى قوية ومستحيل تقع ف يوم أو تنكسر) صقفت وبصيت للى جنبى ومن بين دموعى قلت له......احنا كبار قوى يا سيد...... ورغم انه ماسموش سيد... ما اندهشش ولمحت دموع الفخر بمصر ف عنيه..... تحيا مصر.







الرابط الأساسي


مقالات خالد جلال :

الشاطر سونة والوحش
«كان عينا ميهراجاااان»
تعالى يا روح
هاللو يا هاللو

الاكثر قراءة

«روز اليوسف» داخل شركة أبوزعبل للصناعات الهندسية.. الإنتاج الحربى شارك فى تنمية حقل ظهر للبترول وتطوير قناة السويس
الدولة تنجح فى «المعادلة الصعبة»
كاريكاتير أحمد دياب
ماجدة الرومى: جيش مصر خط الدفاع الأول عن الكرامة العربية
الانتهاء من «شارع مصر» بالمنيا لتوفير فرص عمل للشباب
مباحث الأموال العامة تداهم شركة «تسفير» العمالة للخارج بالنزهة
جنون الأسعار يضرب أراضى العقارات بالمنصورة

Facebook twitter rss