>



صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

25 سبتمبر 2018

أبواب الموقع

 

المقالات

أحجار علي رقعة شطرنج انشراح!

26 يونيو 2012

بقلم : ايمان امبابى




عادت ثانية لعادتها الموسمية.. قراءة الكتب.. باغتتني وهي تحمل كتابا كبيرا في يدها.. وتضع نظارتها الطبية علي عينيها: شفتي بقي.. أهو طلع في الآخر كلامه صح؟

سألتها منتبهة فقد تلبستها روح الجدية: هو مين يا إنشراح؟

قالت بحزم: الإعلامي الدكتور بتاع القناة إياها اللي ما بتحبيهاش.

أشحت عنها بوجهي قائلة: آه.. رجعتي تاني تبوظي دماغك بإيدك.

قالت ضاحكة: ما أنا مش راضية أقول اسمه عشان ما تتضايقيش.. اسمعي بس.. أنا عارفة إنه مش بيتصرف من دماغه.. ده بيشتغل بالريموت كنترول.. والناس كلها عارفين مين اللي بيشغله.. بس والله المرة دي طلع كلامه، قصدي كلامهم صح.

قلت لها بعدم اكتراث وأنا أمسك بالريموت كنترول متنقلة بين القنوات وقد أغلقت الصوت: اللي هو إيه؟

قالت: اللي هو الصهيونية العالمية الماسونية.. اللي هدفها تحكم العالم.. هي اللي بتحرك كل الثورات في العالم كله من زمان ولغاية دلوقت.

أدرت وجهي إليها وعندما التقت عينانا سألتها: صح إزاي يعني؟

تلبستها روح دارون عند اكتشافه الجاذبية الأرضية وقالت: الكتاب ده بيقول كده.

هنا نظرت إلي غلاف الكتاب الذي رفعته أمامي.. رأيته بوضوح.. كان كتاب «أحجار علي رقعة الشطرنج».. قلت لها: إيه اللي خلاكي تقري الكتاب ده؟

قالت: رحت المكتبة وطلبت من اللي بيبيع، كتب بتتكلم عن الصهيونية العالمية الماسونية.. فاداني الكتاب ده.. إيه ماله الكتاب مش عاجبك؟.. هاخلصه واديهولك تقريه وبعدين ابقي ناقشيني فيه.

قلت لها ضاحكة: وماله يا إنشراح.. اقراه تاني.. انا قريته من 20 سنة تقريبا بس احب اقرأه تاني.

قالت مهتمة: ماله بقي الكتاب؟

قلت وأنا اعد نفسي لإجابتها مسبقا: مالوش يا إنشراح.. بس دي وجهة نظر الكاتب مش أكتر.. مش معناه إن اللي قاله قرآن يعني.

قالت معترضة: بس أنا لقيت اللي قاله صح.. في كل الثورات اللي قامت زمان.. وفي الثورات اللي شغالة دلوقت.. تنكري إن الأناركية الشيوعيين الثوريين اللي قاموا بالثورات زمان.. زيهم عندنا دلوقت؟

قلت: الشيوعيون قاموا بثورات وحكموا.. الثوريين بتوعنا ماحكموش يا إنشراح؟

قالت مندهشة: بس هما اللي قاموا بالثورات!

قلت: آه قاموا بالثورات بس فيه ناس تانية حكمت.. ماتوا وفيه ناس تانية دخلت مجلس الشعب.. عينيهم راحت وفيه ناس تانية وصلت لأعلي منصب في البلد.

قالت: آه بس هما برضه منظمين ومنتشرين في البلد كلها زي ما قال الكتاب.

قلت: وماله.. بس الكتاب بيتكلم عن الجماعات السرية.. مش عن اللي بيشتغلوا في النور.. عن اللي بيجيلهم فلوس من جوه ومن بره.. مش اللي بيشتغلوا علي قدهم.. عن اللي عندهم أهداف بيفضلوا سنين يجروا وراها.. مش اللي قلبهم علي البلد يا انشراح!

قالت: طب ما هي الفوضي اللي بقالها سنة ونص دي، زي اللي الكتاب ماقال عليها بالظبط!

قلت: لازم تكون بالظبط لأن الجماعات السرية بتشتغل زي بعض.. شيوعية بقي.. إسلامية.. أي حاجة.. كلها شبه بعض.. من بلد لبلد.. ومن عصر لعصر.

ثم فجأة انفجرت ضاحكة وهي تقول: شفتي بقي تقعدي تقوليلي بلاش الإعلامي الدكتور.. بلاش القناة دي هاتبوظ دماغك.. وإنتي مثبتة عليها أهه!

كانت قد ضبطتني ومازال الريموت كنترول في يدي.. وقد نسيت أنني ثبت الصورة علي تلك القناة.. والرجل يتحرك ويتقافز ويشيح بكلتا يديه ويفغر فاه.. بلا صوت.

قلت لها: ماتغيريش الموضوع يا انشراح.. انا نسيته وانا باتكلم معاكي.. خلينا في موضوعنا.

قالت جادة: طب بجد بقي.. هما اللي بيشغلوا الريموت بتاع الإعلامي الدكتور قروا الكتاب ده؟

قلت: يمكن!

قالت: لأ مش يمكن.. ده أكيد.. وهما اللي حكوا له علي اللي فيه.. وقالوله يشتغل عليه.. أصل بصراحة مش هاقتنع إنه قراه.. ده بيقرا الورق اللي قدامه غلط.. وبعدين لو قراه مش هايفهمه أصلا.. هما قروه.. وقعدوا معاه قعدة فهموهوله براحة.. وقسمهوله كمان.. كل حلقة ياخد جزء.

سألتها: طب تفتكري ليه يعملوا كده؟

قالت مقتنعة: عشان عارفين إن الناس اللي علي قدها بتسمعه.. وهما عاوزين الناس دي يبعدوا عن الأناركية الثوريين.. ويترعبوا منهم.

سألتها: وهما اللي ماسكين الريموت مقتنعين باللي في الكتاب يا إنشراح؟

قالت: أكيد.. دة شغل خد أكتر من سنة ونص.. يبقوا مقتنعين واللا لأ؟

قلت: طب وانتي مقتنعة؟

قالت بتردد: لغاية دلوقت آه.. أخلص الكتاب وبعدين أقول لك.. بس عاوزة أسألك علي حاجة.. أبو الفتوح بتاعكو أخباره إيه؟

قلت ممتعضة: إيش عرفني!

سألت شامتة: هو ما عرفش اللي الإخوان عملوه معاكي ومع باقي الناس في التحرير في اليوم المهبب ده؟

قلت باقتضاب وأنا أتحسس وجهي وقد بدأت الآثار الزرقاء للكدمات تختفي: عرف.

قالت: أنا قلت لك ماصدقتنيش.. قلتلك إخوان وهايحنلهم في الآخر ماسمعتيش كلامي.. وبعدين هو احنا مش زي اللي كان بيسافرلهم أفغانستان؟

ثم قامت لتتمشي أمامي.. فلم أنتبه أنها قد قامت بإزالة الجبس من ساقها.. بعد ثلاثاء الإخوان الأسود في 5 يونيه.. وقالت: أصل أنا بعد ما كتبت اللي الإخوان عملوه معانا في التحرير علي الفيس بوك.. لقيت رسالة من الأستاذ عمرو موسي.. بيقوللي حمد الله علي السلامة وكده يعني.. وبيسأل لو عاوزة أي حاجة.. برضه راجل الدولة بيفهم في الأصول.. مش أناركية وشيوعيين ثوريين ومصر القوية وكلام فاضي!







الرابط الأساسي


مقالات ايمان امبابى :

غزة مش جنب شبرا!
انشراح تنفصل عن 6 إبريل!
إنشراح تكشف مؤامرة الشاطر!
انشراح تغلق مكتب الجزيرة مباشر مصر!
الشيخ ممدوح الولي!
انشراح ومسابقة الدكتورة!
إنشراح.. و«تمرجية» الإخوان!
إنشراح في المحكمة الدولية!
إنشراح وثورة رومانيا والمماليك!
انشراح تحمل البطاطس لبيتى!
انشراح هاتنتخب راجل دولة!
ملاعين 6 إبريل!

الاكثر قراءة

الحاجب المنصور أنقذ نساء المسلمين من الأسر لدى «جارسيا»
جامعة طنطا تتبنى 300 اختراع من شباب المبتكرين فى مؤتمرها الدولى الأول
يحيا العدل
جماهير الأهلى تشعل أزمة بين «مرتضى» و«الخطيب»
4 مؤسسات دولية تشيد بالتجربة المصرية
مصر محور اهتمام العالم
قمة القاهرة واشنطن فى مقر إقامة الرئيس السيسى

Facebook twitter rss