>



صحيفة روز اليوسف

رئيس مجلس الإدارة
عبد الصادق الشوربجي

رئيس التحرير
أحمد باشا

14 ديسمبر 2018

أبواب الموقع

 

المقالات

انشراح ومسابقة الدكتورة!

19 يونيو 2012

بقلم : ايمان امبابى




 

 

 

 

 

 

 

 

دققت الجرس على باب شقة انشراح.. وأنا أتوقع أن يمضى وقت طويل حتى تفتح لى.. فمازالت قدمها موضوعة فى الجبس منذ موقعة 5 يونيو الماضى.. كنت أتحسس آثار الكدمات على عينى.. عندما فتحت الباب وهى تستند على عصاها.. دلفت وأنا أغلق الباب خلفى.. قالت: تعالى تعالى.. أنا كنت لسة هاكلمك أسأل عليكى.. مش هاتبطلى تقعدى تجيبى فى سيرتى على الفيس بوك؟.. سألتها: إيه دة إمتى؟.. قالت: فى جريدة صوت الأمة من يومين فيه صحفية كاتبة اللى العيال بيقولوه على الفيس بوك.. قايلين «زغرتى يا انشراح على البرلمان اللى راح».

ضحكت وأنا أقول لها: طب أنا بقالى كتير ما باجيبش سيرتك على الفيس بوك.. وبعدين أنا كنت باقول ألطمى يا انشراح مش زغرتى يا انشراح..

 

وقعت عينى على كمية كبيرة من الأوراق الصغيرة مبعثرة على المائدة التى تتوسط صالونها الصغير.. وآلة حاسبة صغيرة شاشتها مزدحمة بأرقام كثيرة.. كانت إحدى الفضائيات تستعرض أرقاما متتالية للأصوات التى حصل عليها كلا المرشحين مرسى وشفيق.. سألتها: إيه الورق دة كله بتعملى إيه؟

 

قالت ضاحكة: شوفى أنا بقالى يومين دماغى باظت من الأرقام اللى كل الفضائيات بتقولها عن الانتخابات.. وكلها غير بعضها.. فقلت أقعد بنفسى أحسب كل واحد فيهم خد كام صوت على كل قناة.

 

قلت: بس دى حاجة مستحيلة يا انشراح.

 

قالت: لأ هى مش مستحيلة.. أنا حسبتها.. هى مسخرة.

 

قلت: يعنى إيه؟

 

قالت وهى تنتقى من الأوراق التى أمامها: شوفى يا ستى.. مرسى طالع الأول على قناة الجزيرة ومصر 25 .. وشفيق طالع الأول على قناة أون تى فى والنهار.. والاتنين طالعين الأول على باقى القنوات.

 

سألتها: يعنى إيه الاتنين طالعين الأول على باقى القنوات؟!

 

قالت ضاحكة: يعنى باقى القنوات الفضائية الصبح تجيب مرسى الأول.. والضهر شفيق الأول.. وبعد الضهر يرجع تانى مرسى الأول.. وبالليل بقى يعملوا الفتة بتاعت الفقهاء والخبراء الاستراتيجيين الجامدين جدا.. اللى يقعدوا يشرحوا إن إذا حسبنا أصوات محافظات كذا يبقى شفيق الأول.. أما إذا حسبنا محافظات كذا فيبقى مرسى الأول.. وطبعا لازم يختموا الكلام بإن دى كلها مجرد مؤشرات ولازم نستنى النتيجة الرسمية!

 

ضحكت قائلة: طب وانتى واجعة قلبك معاهم ليه لما هى الحكاية كده؟!

 

قالت: لأ ما انتى مش واخدة بالك.. أنا باركز فى اللى بيتقال كويس.. عشان هادخل المسابقة اللى عاملاها ست الدكتورة.

 

سألتها مندهشة: دكتورة إيه؟!

 

قالت: ست الدكتورة اللى طول الوقت بتبقى باصة فى المرايا وهى بتقدم الحلقة

 

سألتها: مرايا إيه يا انشراح؟

 

قالت جادة: آه والله.. أنا مش فاكرة اسمها.. أصل انا بدأت اتابعها قريب.. هى بتبقى بتكلم الضيف بس باصة فى مراية حاطينها قدامها.. وتقعد تساوى شعرها وتعدل هدومها قدام المرايا.. والضيف بيكلم نفسه.

 

قلت وقد ملأنى الفضول: إيه ده.. مين دى.. إوصفيها لى مش عارفاها.

 

قالت: بتقدم برنامج بييجى الساعة تسعة بالليل.. وعاملين عقد مع القهوة اللى جنبهم.. العيال اللى شغالين فى القهوة بيدخلوا المشاريب للضيوف وهما بيتكلموا على الهوا.. وبعدين أنا شفت المرايا اللى حاطينهالها عشان تعدل شعرها فيها.. مرة الكاميرا جابتها.

 

سألتها يائسة من معرفة من هى المذيعة: لا مش عارفاها برضه يا انشراح.. المهم.. مسابقة إيه اللى عاملاها الدكتورة المذيعة؟

 

قالت: عاملة مسابقة للى يعرف مين فى الاتنين اللى هاينجح قبل يوم الخميس

 

سألتها: وانتى عرفتى؟

 

قالت واثقة: طبعا عرفت وهابعتلها بالليل على إيميل البرنامج

 

سألتها: مين يا انشراح؟

 

قالت: مرسى طبعا

 

قلت: وعرفتى منين؟

 

قالت: شوفى يا ستى.. الحكاية أصلها ماتش كورة.. الإخوان بيلعبوا مع التانيين.. والمجلس العسكرى بيحكم بينهم.. طردلهم واحد.. وبعدين طرد التانى.. وهايطرد التالت بعد كام يوم.. وجت لهم ضربة جزاء.. ينفع مايحسبهاش؟

 

قلت: لأ ماينفعش!

 

قالت مزهوة: طيب أديكى قلتى.. طار مجلس الشعب.. وطارت تأسيسية الدستور.. وهايطير كمان كام يوم الشورى.. ينفع بقى كمان تطير الرياسة؟

 

لم أجب.. فعادت تقول: ينفع كده؟.. طبعا ما ينفعش..

 

قلت: آه بس الحكاية مش كده خالص.

 

قالت مؤكدة: لأ هى كده من الآخر.. وبعدين أنا هاموت وأشوف مرسى رئيسا لمصر.

 

قلت مندهشة: ليه بقى إنشاء الله.. من امتى؟

 

قالت وقد انتابها الضحك: أموت وأشوفه وهو مش عارف يكلم المرشد.. ولا عارف يقابله.. ولا يبوس إيده.. ولا عارف يروحلهم المقطم.. ولا عارف يقابل حد من اصحابه بتوع الإخوان.. ولا هايشوف ولاده إلا بمعاد.. آه طبعا.. هما أمريكان مش ممكن يعيشوا معاه فى القصر..

ثم استطردت وقد تلبستها روح الشر: ولا هايقدر يجيب حد منهم نائب ولا رئيس وزرا.. آه هو دخل برجليه ماحدش زقه.. هو اللى تعهد.. وبعدين هاتفرج بقى على العيال بتوع 6 ابريل وهما قاعدين له على الواحدة.. ده كله يريحنى جدا على فكرة.

 

قلت متسائلة: بس كده؟

 

قالت: لأ.. وعشان كمان أكسب المسابقة

 

سألت: ألا هى إيه المسابقة؟

 

قالت: خمستلاف جنيه.. واطلع مع الدكتورة فى الحلقة أشرح إزاى أنا وصلت للنتيجة.. وأشوف المشاريب اللى بيقدموها للضيوف.. ويمكن تدينى صباع روج هدية من الفسفورى اللى بيلمعوا دول اللى هى بتحط منهم!

 







الرابط الأساسي


مقالات ايمان امبابى :

غزة مش جنب شبرا!
انشراح تنفصل عن 6 إبريل!
إنشراح تكشف مؤامرة الشاطر!
انشراح تغلق مكتب الجزيرة مباشر مصر!
الشيخ ممدوح الولي!
أحجار علي رقعة شطرنج انشراح!
إنشراح.. و«تمرجية» الإخوان!
إنشراح في المحكمة الدولية!
إنشراح وثورة رومانيا والمماليك!
انشراح تحمل البطاطس لبيتى!
انشراح هاتنتخب راجل دولة!
ملاعين 6 إبريل!

الاكثر قراءة

«مملكة الحب»
سـلام رئاسى لـ«عظيمات مصر»
«خطاط الوطنية»
«جمـّال» وفتاة فى اعترافات لـ«الداخلية»: ساعدنا المصور الدنماركى وصديقته فى تسلق الهرم الأكبر
هوجة مصرية على لاعبى «شمال إفريقيا»
واحة الإبداع.. لا لون الغريب فينا..
أيام قرطاج ينتصر للإنسانية بمسرح السجون

Facebook twitter rss